Toshkent shahridagi oliy ta'lim muassasalarida darslar boshlanish vaqti o'zgardi

Yangi o'quv yilidan boshlab Toshkent shahrida joylashgan oliy ta'lim tashkilotlarida birinchi smenadagi o'quv mashg'ulotlari soat 08:00 da boshlanishi belgilandi.

Oliy ta'lim vazirligining ma'lum qilishicha, ushbu yangi tartib poytaxtda ertalabki va kechki tig'iz paytlarda yo'llardagi transport yuklamasini kamaytirishga qaratilgan. Shuningdek, mazkur tartib kunduzgi va kechki ta'lim shakllarida tahsil olayotgan talabalar uchun o'quv kunini to'g'ri rejalashtirish, mashg'ulotlar hamda boshqa o'quv faoliyati uchun vaqt imkoniyatlarini kengaytirishga xizmat qiladi.

Yangi o'quv yiliga tayyorgarlik ko'rish jarayonida Toshkent shahridagi oliy ta'lim tashkilotlari rahbarlari, professor-o'qituvchilar, pedagoglar hamda talabalar mazkur tartibni inobatga olishlari so'raladi.

Eslatib o'tamiz, avvalroq Toshkent shahar hokimligi poytaxtdagi bir qator davlat tashkilotlarida ish vaqtini soat 8:00 dan 17:00 gacha deb belgilash taklifini ilgari surgan edi.