Toshkentda 900 o'quvchiga mo'ljallangan yangi AIST School maktabi ochildi

Toshkent shahrida 900 nafar o'quvchiga mo'ljallangan yangi Ahmad International School Tashkent (AIST) ta'lim muassasasi faoliyatini boshladi. Ochilish marosimida mehmonlarga mazkur maktab infratuzilmasi, zamonaviy sinfxonalar hamda o'quvchilar uchun yaratilgan sharoitlar tanishtirildi. Ta'lim dargohi 15 ming kvadrat metr maydonni o'z ichiga olgan bo'lib, bu yerda o'quv xonalari bilan bir qatorda sport zali va futbol maydonlari ham barpo etilgan. Maktab hududida xavfsizlik tizimi uzluksiz ravishda 24/7 rejimida ishlashi ta'minlangan.

Ta'lim dasturi va xalqaro yondashuvlar

Muassasada o'qitish jarayoni milliy o'quv dasturi hamda xalqaro yondashuvlar uyg'unligi asosida tashkil etilgan. O'quvchilar matematika, fizika, kimyo va biologiya kabi an'anaviy fanlar bilan bir qatorda robototexnika, sun'iy intellekt, IT hamda STEAM yo'nalishlarini ham o'rganish imkoniyatiga ega. Kimyo, biologiya, fizika va matematika kabi ayrim tabiiy fanlarni ingliz tilida o'qitishga alohida e'tibor qaratilgan. Shuningdek, yuqori sinf o'quvchilarini IELTS va SAT kabi xalqaro imtihonlarga tayyorlash hamda oliy o'quv yurtiga kirish uchun zarur bo'ladigan portfolio shakllantirish ishlari yo'lga qo'yilishi ko'zda tutilgan.

Xalqaro mutaxassislar va qabul shartlari

Ta'lim jarayoniga xalqaro sertifikatlarga ega pedagoglar jalb qilingan bo'lib, ular orasida Kanadadan kelgan, matematika fanini SAT, IB va Cambridge tizimlari asosida o'qitish tajribasiga ega mutaxassislar ham mavjud. O'qish qiymati oyiga 4,8 million so'mni tashkil etadi va shartnoma tuzilgan vaqtdan boshlab ushbu to'lov miqdori ikki yil davomida o'zgarmasligi belgilandi. Ayni paytda maktabning 1–9-sinflari uchun qabul davom etmoqda va bu jarayon dekabr oyigacha davom etishi rejalashtirilgan.

📍 Manzil: Hasanboy Guzari mahalla fuqarolar yig'ini, Yuqori Hasanboy ko'chasi, 37B