Toshkentda o'quv yili boshlanishi munosabati bilan jamoat transportidan foydalanish tavsiya etildi
Toshkent IIBB o'quv yili boshlanishida yuzaga keladigan tirbandliklarning oldini olish uchun aholini jamoat transportiga chaqirdi.
Poytaxtimizdagi maktablar, akademik litseylar va texnikumlarda 2-sentabr kuni yangi o'quv yili boshlanishi sababli ertalabki vaqtlarda ko'chalarda harakat faollashishi hamda tirbandliklar yuzaga kelishi kutilmoqda. Shu munosabat bilan Toshkent shahar Ichki ishlar bosh boshqarmasi poytaxt aholisiga muhim murojaat bilan chiqdi.
Xavfsizlik va harakatni tartibga solish choralari
Idora o'quvchi hamda talabalarning ta'lim dargohlariga xavfsiz va o'z vaqtida yetib borishini ta'minlash maqsadida fuqarolarni imkon qadar shaxsiy avtomobillar o'rniga jamoat transportidan foydalanishga chaqirdi. Shuningdek, haydovchilardan ta'lim muassasalari yaqinida mashinalarni tartibsiz va uzoq vaqt qoldirmaslik, yo'l harakati qoidalariga qat'iy amal qilish hamda piyodalar va o'quvchilarga yo'l berish talab etildi.
Bayram va o'quv jarayoni boshlanadigan ushbu kunda ta'lim dargohlari atrofida jamoat xavfsizligini ta'minlash, transport vositalari harakatini muvofiqlashtirish va fuqarolarga yordam ko'rsatish uchun ichki ishlar organlarining xodimlari kuchaytirilgan tartibda xizmat o'tab, navbatchilik qiladi.
Eslatib o'tamiz, mamlakatimizdagi umumta'lim maktablari, akademik litsey va texnikumlarda dars jarayonlari 2-sentabrdan boshlanadi. Oliy ta'lim muassasalarida esa yangi o'quv yili grafigiga ko'ra, birinchi bosqich talabalari uchun 7-sentabrdan, ikkinchi va undan yuqori kurs talabalari uchun esa 14-sentabrdan boshlanishi belgilangan.
Manba: Kun.uz
