Urganchda iqtidorli talabalarning ota-onalariga vazir tashakkurnomalari topshirildi

Urganchda iqtidorli talabalar va ularning ota-onalari e'tirof etildi

Urganch davlat pedagogika institutida bo'lib o'tgan uchrashuvda ilm-fan, ta'lim va yuksak maqsadlar sari intilib kelayotgan bir guruh iqtidorli yoshlar hamda ularning ota-onalari taqdirlandi. Tadbir davomida so'z olgan institut rektori Diyorjon Abdullayev yoshlarning erishayotgan yutuqlarida ota-onalarning o'rni beqiyos ekanini ta'kidlab, ularga samimiy minnatdorlik bildirdi.

Vazir tashakkurnomasi topshirildi

Intellektual salohiyati, bilimga chanqoqligi hamda ilmiy-ijodiy faoliyatidagi muvaffaqiyatlari bilan tengdoshlariga o'rnak bo'layotgan iqtidorli talabalarning ota-onalariga Oliy ta'lim, fan va innovatsiyalar vaziri Qo'ng'irotboy Sharipovning tashakkurnomalari topshirildi.

Tadbirda qatnashgan ota-onalardan biri Yulduz Sa'dullayeva bu e'tibor o'zlari uchun kutilmagan va quvonarli voqea bo'lganini ta'kidlab, bunday e'tirof farzandlarni yangi marralar sari ruhlantirishi va oila tarbiyasiga berilgan yuksak baho ekanini bildirdi. Uchrashuv yakunida yoshlarning kelgusidagi o'qish va ilmiy faoliyatiga muvaffaqiyatlar tilandi.