Xorazm maktablarida favqulodda vaziyatlarga bag'ishlangan maxsus o'quv mashg'ulotlari o'tkazilmoqda
Xorazm viloyatida maktab o'quvchilari va o'qituvchilari uchun favqulodda vaziyatlarda to'g'ri harakat qilish ko'nikmalarini shakllantirishga qaratilgan amaliy tadbirlar tashkil etildi.
Xorazm viloyati maktabgacha va maktab ta'limi boshqarmasi hamda favqulodda vaziyatlar viloyat boshqarmasi hamkorligida ta'lim muassasalarida xavfsiz muhitni ta'minlashga qaratilgan maxsus tadbir bo'lib o'tdi.
Urganch shahridagi 13-son umumta'lim maktabida “Ob'ektlarda favqulodda vaziyatlar xavfi yuzaga kelganda yoki sodir bo'lganda xodimlarni muhofaza qilish tadbirlarini tashkil qilish va amalga oshirish” mavzusida maxsus taktik o'quv mashg'uloti tashkil etildi. Ushbu jarayonda boshqarmalar xodimlari, pedagoglar bilan birgalikda o'quvchilar ham faol qatnashib, kutilmagan vaziyatlarda to'g'ri harakat qilish bo'yicha amaliy ko'nikmalarni o'rganishdi.
Amaliy ko'nikmalar va evakuatsiya jarayoni
Mashg'ulotlar davomida ishtirokchilarni xavfsiz hududga tartibli evakuatsiya qilish, yong'in o'chirish vositalaridan foydalanish hamda tezkor xizmatlar bilan hamkorlikda harakat qilish bo'yicha amaliy mashqlar bajarildi. Mazkur jarayonga tegishli tashkilotlar mutaxassislari, yong'in o'chirish texnikalari va tez tibbiy yordam brigadalari ham jalb qilindi.
Ta'lim muassasalarida xavfsiz muhitni ta'minlash hamda tayyorgarlik darajasini oshirishga qaratilgan bunday o'quv mashg'ulotlarini bosqichma-bosqich viloyatning barcha tuman va shaharlarida o'tkazish rejalashtirilgan.
Manba: UzA
