Yoshlik talabalar shaharchasida xavfsizlikni ta'minlash va sharoitlarni yaxshilash ishlari

Yurtimizda talabalarga zamonaviy hamda xavfsiz muhit yaratish yo'nalishida qator amaliy ishlar bajarilmoqda. Joriy yil 5-yanvarda qabul qilingan "Respublika mahallalarida xavfsiz muhitni yaratish yo'nalishida yaxlit manzilli ishlash tizimini joriy etishga qaratilgan qo'shimcha chora-tadbirlar to'g'risida"gi Prezident qarori bu borada muhim huquqiy asos bo'lmoqda. Mazkur vazifalar ijrosi doirasida "Yoshlik" talabalar shaharchasida raqamli texnologiyalar asosida ishlaydigan vaziyatlar markazi ishga tushirildi. Markaz hududdagi ijtimoiy muhitni real vaqt rejimida kuzatish, talabalar davomatini nazorat qilish va huquqbuzarliklarning oldini olishga mo'ljallangan. Umumiy maydoni 1 ming 368 kvadrat metr bo'lgan "Yoshlik" talabalar shaharchasi hokimligi binosi 2024-yilda qurilgan bo'lib, uni mukammal ta'mirlash, vaziyatlar markazini ochish hamda hududni obodonlashtirishga 33 milliard so'm mablag' ajratilgan. Shaharchada 75 mingdan ziyod talaba tahsil oladi. Hududda jami 42 ta talabalar turar joyi mavjud bo'lib, ularning sig'imi 18 mingdan ortiq yoshlarni o'z ichiga oladi. Joriy yil sentabr oyida Prezidentning shaharchaga tashrifidan so'ng bu yerda yangi imkoniyatlar yaratildi.

Vaziyatlar markazi va uning imkoniyatlari

Yangi tashkil etilgan vaziyatlar markaziga oliy ta'lim o'quv binolari, talabalar turar joylari, ko'chalar va savdo shoxobchalari to'liq integratsiya qilindi. Markaz 17 ta axborot tizimi bilan bog'langan bo'lib, bu turli ma'lumotlarni yagona raqamli platformada tezkor tahlil qilish imkonini beradi. Tizim yordamida yotoqxonalarda yashovchi 17,5 ming nafar hamda jami 75 mingga yaqin talabaning xavfsizligi ta'minlanadi, ularning davomati nazorat qilinadi.

Talabalar uchun yaratilgan qo'shimcha sharoitlar

Shaharchada talabalarning bo'sh vaqtini mazmunli o'tkazishi uchun Kimyo, Biologiya, Fizika, Matematika, AT, Geologiya va Energetika kabi 7 ta fan bog'lari barpo etildi. Ularning fakultetlarga kiraverishda ochilgani yoshlarga darsdan keyin o'z mutaxassisligi muhitida o'tirishga sharoit yaratdi. Shuningdek, talabalar uchun 8 ta maishiy xizmat shoxobchasi, jumladan book-kafe va oziq-ovqat do'konlari ish boshladi. Ayni paytda hokimlik binosida vaziyatlar markazidan tashqari startap xonasi, Oliy ta'lim tarixi muzeyi, Yoshlar ishlari agentligining tuman bo'limi hamda xotin-qizlar tadbirkorligi markazi ham faoliyat yuritmoqda.