Al-Jabr xalqaro maktabi Markaziy Osiyo olimpiadasiga mezbonlik qildi
O'zbekiston, Qozog'iston va Qirg'izistondan 300 ga yaqin o'quvchi ishtirok etgan xalqaro fan olimpiadasi bo'lib o'tdi.
Sun Life oromgohida o'tkazilgan xalqaro musobaqada O'zbekiston, Qozog'iston va Qirg'izistondan 300 ga yaqin o'quvchi ishtirok etdi. Mazkur tadbirda o'quvchilar matematika, IT, mental arifmetika, ingliz, arab va rus tili fanlari bo'yicha o'z bilimlarini sinovdan o'tkazdi.
Al-Jabr xalqaro maktabi direktori Matluba Karaxodjayevaning ta'kidlashicha, ta'lim muassasasi o'quvchilari avvalgi yillarda ham ko'plab nufuzli xalqaro olimpiadalarda muvaffaqiyatli qatnashgan. Bu yil esa maktab ilk bor mezbon sifatida Markaziy Osiyo davlatlari o'rtasidagi xalqaro olimpiadani tashkil etdi.
Musobaqaning asosiy maqsadlari
Bellashuvdan ko'zlangan asosiy maqsad har bir o'quvchiga o'z bilimini sinab ko'rish, xalqaro tajriba orttirish va oldiga yanada yuqori marralarni qo'yish uchun imkoniyat yaratishdan iborat. Shuningdek, bu yil olimpiada dasturiga ilk bor IT yo'nalishi ham kiritildi.
Ushbu olimpiadaning yana bir muhim jihati shundaki, unda qo'shni davlatlar bilan bir qatorda O'zbekistonning barcha hududlaridan ham o'quvchilar qatnashdi. Natijada tadbir yuzlab iqtidorli yoshlarni birlashtirgan ilmiy bellashuv maydoniga aylandi. Jarayonlarni ota-onalar bevosita kuzatdi. Ular farzandlarining bilim saviyasi, masalalarni yechish uslubi, sahnadagi ishonchi va raqobat muhitidagi faolligiga yaqindan guvoh bo'ldi. Bu esa o'quvchilar uchun qo'shimcha motivatsiya bo'lib, mas'uliyat hissini yanada oshirdi.
Qayd etilishicha, mazkur bellashuv g'oliblari joriy yilning oktyabr oyida Turkiyaning Istanbul shahrida o'tkaziladigan xalqaro olimpiadada ishtirok etish imkoniyatini qo'lga kiritadi.
Manba: Kun.uz
