Milliy sertifikat imtihoniga kela olmaganlar uchun yangi tartib belgilandi
Milliy sertifikat imtihonida uzrli sabab bilan qatnasha olmagan talabgorlarga mablag'ini qaytarish yoki qo'shimcha to'lovsiz qatnashish imkoniyati beriladi.
Bilim va malakalarni baholash agentligi milliy sertifikat sinovlarida qatnasha olmagan talabgorlar uchun yangi tartibni joriy qildi. Unga ko'ra, chet tili va umumta'lim fanlari bo'yicha o'tkaziladigan milliy sertifikat imtihonlariga uzrli holatlar tufayli kela olmagan ishtirokchilar to'lagan mablag'ini qaytarib olishlari yoki navbatdagi imtihonda qo'shimcha to'lovsiz ishtirok etish imkoniyatiga ega bo'ladilar.
Mazkur yangi tartib kasallik, xizmat safari yoki yaqin oila a'zosining vafoti kabi holatlarga nisbatan qo'llanadi. Bunda talabgor ko'rsatilgan sabablarni tasdiqlovchi tegishli hujjatlarni taqdim etishi shart.
Shu bilan birga, imtihonga uzrsiz kelmagan, belgilangan vaqtdan kechikib kelgan yoki imtihon qoidalarini buzgani uchun auditoriyadan chetlashtirilgan talabgorlarga bu imkoniyat berilmaydi. Ushbu yangilik ishtirokchilarning uzrli holatlarini inobatga olish hamda ularning huquqlarini himoya qilish maqsadida yo'lga qo'yildi.
Manba: Kun.uz
