Bog'cha pedagoglari uchun dual ta'lim shaklida o'qish imkoniyati yaratiladi
Davlat va nodavlat maktabgacha ta'lim tashkilotlari xodimlari to'lov-shartnoma asosida dual ta'lim olishlari rejalashtirilmoqda.
Yangi loyihaga asosan, davlat hamda nodavlat maktabgacha ta'lim tashkilotlarida mehnat faoliyatini yuritayotgan pedagoglar to'lov-shartnoma asosida tahsil olish imkoniyatiga ega bo'ladilar. Dual ta'lim shaklini tanlagan talabalar haftaning bir kunini pedagogika oliy ta'lim tashkilotida o'qish bilan o'tkazsalar, qolgan besh kunida o'zlarining maktabgacha ta'lim muassasasidagi ish faoliyatini davom ettiradilar.
Bakalavrlar tayyorlash va ro'yxatdan o'tish tartibi
Shu bilan birga, maktabgacha ta'lim yo'nalishi bo'yicha dual ta'lim shaklida bakalavr kadrlarni tayyorlash yo'lga qo'yilishi ko'zda tutilgan pedagogika oliy ta'lim muassasalarining ro'yxati ham omma e'tiboriga havola etildi.
Mazkur ta'lim yo'nalishiga o'qishga kirish istagida bo'lgan abituriyentlardan hujjatlar har yili 5 iyundan boshlab 25 iyungacha qabul qilinadi. Jarayon bir bosqichda amalga oshiriladi. Ro'yxatdan o'tish chog'ida nomzodlar o'zlariga kerakli bo'lgan ta'lim yo'nalishi, ta'lim tili hamda test topshirish hududini mustaqil ravishda tanlaydilar.
Manba: Kun.uz
