Buxgalterlarni xalqaro sertifikatlash imtihon xarajatlarini qoplash tartibi tasdiqlandi

O'zbekiston Respublikasi Vazirlar Mahkamasi tomonidan buxgalterlarni xalqaro sertifikatlash doirasida imtihon topshirish xarajatlarini qoplab berish tartibini belgilovchi vaqtinchalik nizom qabul qilindi. Hujjat O'zbekiston Respublikasi fuqarolari hamda mamlakatimizda doimiy yashovchi fuqaroligi bo'lmagan shaxslarga tatbiq etiladi.

Nizomda nimalar belgilangan?

Tasdiqlangan vaqtinchalik nizom quyidagi masalalarni tartibga soladi:

• imtihon xarajatlari tarkibi hamda xarajatlari qoplanadigan shaxslar toifasi;
• xarajatlarni qoplab berish tartibi va uni moliyalashtirish manbalari.

Mazkur hujjat 2028-yil 31-dekabrgacha amal qilishi ko'rsatilgan. 2028-yil dekabr oyida kelib tushadigan arizalarni ko'rib chiqish va imtihon xarajatlarini qoplab berish ishlari 2029-yil 20-yanvarga qadar bajariladi.

Davlat xizmatlarini joriy etish muddatlari

Qarorga ko'ra, 2026-yil 1-iyulga qadar ushbu yo'nalishda davlat xizmatini ko'rsatish uchun zarur hujjatlar, ularning namunaviy shakllari hamda blankalari ishlab chiqilib, tegishli tartibda tasdiqlanishi kerak.

Shuningdek, 2026-yil 1-iyunga qadar Raqamli texnologiyalar vazirligiga Yagona interaktiv davlat xizmatlari portali orqali elektron davlat xizmatini kiritish vazifasi yuklatilgan. Vazirlik bilan hamkorlikda ariza beruvchilar taqdim etadigan hujjatlarning avtomatik ravishda talablarga muvofiqligini tekshiruvchi hamda saralovchi tizim ishga tushiriladi. Buning natijasida YIDXPda murojaatlarni har bir bosqichda kuzatib borish imkoniyati yaratiladi va tegishli idoralarning axborot tizimlari o'zaro integratsiya qilinadi.