Farg'ona davlat texnika universiteti yangi o'quv yili uchun qabul kvotalarini e'lon qildi

Farg'ona davlat texnika universiteti 2026-2027 o'quv yili uchun o'zining 52 ta bakalavriat ta'lim yo'nalishiga 5500 dan ortiq abituriyentlarni qabul qilishni rejalashtirgan. Mazkur o'rinlarning 3950 nafari aynan kunduzgi ta'lim shakliga ajratilgan. Shu bilan birga, 48 ta magistratura mutaxassisligi bo'yicha 445 nafar yoshlarning talabalikka qabul qilinishi ko'zda tutilgan.

Mazkur raqamlar oliygohda tashkil etilgan “Ochiq eshiklar” aksiyasi doirasidagi matbuot anjumanida ma'lum qilindi. Tadbirda universitet rahbariyati joriy yilgi qabulning asosiy yo'nalishlari, yaratilgan yangi ta'lim imkoniyatlari, kvotalar hamda jarayonlarning shaffofligini ta'minlash borasida qilinayotgan ishlar xususida atroflicha to'xtaldi.

Qabul jarayonlari va shaffoflik

Universitet mas'ul kotibi Azizxon Xo'jayevning so'zlariga ko'ra, bakalavriat yo'nalishlari bo'yicha qabul jarayonlarining boshlang'ich bosqichi muvaffaqiyatli yakunlangan. Endaldagi asosiy vazifalar sirasiga magistratura, ikkinchi mutaxassislik hamda o'qishini xorijdan ko'chirmoqchi bo'lgan fuqarolar bilan ishlash kiradi. Oliy o'quv yurtida qabul jarayonlari to'liq ochiqlik va shaffoflik asosida tashkil etilmoqda. Shu maqsadda maxsus maslahat markazlari ish boshlagan bo'lib, ro'yxatdan o'tishda qiynalgan abituriyentlar kerakli hujjatlar bilan kelib, amaliy yordam olishlari mumkin.

Zamonaviy imkoniyatlar bilan tanishuv

Matbuot anjumani doirasida qatnashchilar universitetdagi sun'iy intellekt laboratoriyasi hamda Axborot-resurs markazi faoliyati bilan yaqindan tanishdilar. Shuningdek, ularga “Airoinjinering” texnoparki va u yerda qishloq xo'jaligi sohasiga mo'ljallab ishlab chiqarilayotgan dronlar haqida ham batafsil ma'lumotlar taqdim etildi.