Forish tumanida Maktabgacha va maktab ta'limi vazirligining sayyor qabuli bo'lib o'tdi

Jizzax viloyatining Forish tumanida O'zbekiston Respublikasi Maktabgacha va maktab ta'limi vazirligining navbatdagi sayyor qabuli tashkil etildi. Ochiq muloqot shaklida o'tgan uchrashuvda soha xodimlari hamda fuqarolarning murojaatlari ko'rib chiqilib, ulardagi masalalar yuzasidan aniq chora-tadbirlar belgilandi. Qabul davomida har bir murojaatning mohiyatiga e'tibor qaratilib, ayrimlari shu yerning o'zida ijobiy hal etildi, ba'zilariga esa zarur huquqiy va me'yoriy tushuntirishlar berildi. Qo'shimcha o'rganish va vaqt talab qiladigan mas'uliyatli murojaatlar nazoratga olindi.

Jasur o'quvchi munosib taqdirlandi

Sayyor qabul doirasida ijtimoiy tarmoqlarda keng tarqalgan voqea ham e'tibordan chetda qolmadi. O'z hayotini xavf ostiga qo'yib, kichik sinf o'quvchisining hayotini saqlab qolgan Forish tumanidagi 1-sonli umumta'lim maktabi o'quvchisi Shahzod O'tkirovning mardligi va jasorati e'tirof etildi. Unga Vazirlik tomonidan maxsus tashakkurnoma hamda zamonaviy noutbuk sovg'a qilindi. Ushbu e'tibor yoshlarni ezgu ishlarga ruhlantirish va ularda hushyorlik hamda mehr-oqibat fazilatlarini rag'batlantirishga qaratildi.

Kutubxona fondi boyitildi

Shuningdek, yosh avlodning kitobxonlik madaniyatini yuksaltirish hamda ularning ilm olishga bo'lgan qiziqishini qo'llab-quvvatlash maqsadida Forish tumanidagi 1-sonli umumta'lim maktabi kutubxonasiga boy kitoblar jamlanmasi topshirildi. Ma'naviyat va bilimga oshno etilgan yoshlar kelajakda jamiyat taraqqiyotining ishonchli tayanchiga aylanishi ta'kidlandi. Forishdagi mazkur tadbir murojaatlarni tinglash barobarida ibratli yoshlarni rag'batlantirish va ta'lim muassasalarining ma'rifiy imkoniyatlarini kengaytirish yo'lidagi amaliy qadam bo'ldi.