Ixtisoslashtirilgan maktablar uchun yangi avlod darsliklari nashrga tavsiya etildi

Ixtisoslashtirilgan ta'lim muassasalari agentligining ilmiy-metodik kengashi navbatdagi yig'ilishini o'tkazdi. Unda nufuzli oliygohlar olimlari, amaliyotchi pedagoglar va darslik mualliflari qatnashdi.

Tadbir davomida agentlik tizimidagi maktablar uchun tayyorlangan 8-sinf algebra va geometriya darsliklari, shuningdek, Cambridge University Press bilan hamkorlikda yaratilgan 9-sinf fizika hamda biologiya darslik majmualari ko'rib chiqildi. Bundan tashqari, 7-sinf kimyo fani o'qituvchisi kitobining o'zbek tiliga mahalliylashtirilgan nashrlari muhokama markazida bo'ldi.

Ta'lim dasturlari integratsiyasi va ekspert xulosalari

Yig'ilishda Abu Ali ibn Sino nomidagi ixtisoslashtirilgan maktab hamda Farmatsevtika texnika universiteti hamkorligida integratsiyalashgan ta'lim dasturlarini joriy etish masalalari ham ko'rib chiqildi. Mualliflar o'z taqdimotlarini namoyish etib, mutaxassislar va ekspertlarning fikrlarini tinglashdi. Bildirilgan taklif va tavsiyalar asosida muhokama qilingan o'quv adabiyotlarini nashrga tavsiya etish bo'yicha tegishli qarorlar qabul qilindi.