Andijondagi maktabda inklyuziv ta'lim muhitini takomillashtirishga bag'ishlangan seminar bo'lib o'tdi

Andijon shahridagi 17-umumta'lim maktabida inklyuziv ta'lim muhitini rivojlantirish hamda takomillashtirishga bag'ishlangan amaliy seminar tashkil etildi. Ushbu tadbir Ijtimoiy inspeksiya Andijon viloyati boshqarmasi tashabbusi ostida viloyat hokimligi, Ijtimoiy himoya milliy agentligi hamda Maktabgacha va maktab ta'limi boshqarmasi bilan hamkorlikda o'tkazildi.

Tadbir davomida nogironligi bo'lgan shaxslarni har tomonlama qo'llab-quvvatlash, ularning sifatli ta'lim olishlari uchun barcha teng imkoniyatlarni yaratish masalalari muhokama qilindi. Ma'lum qilinishicha, bugungi kunda Andijon viloyatidagi jami 225 ta umumta'lim maktabida 476 nafar o'quvchi inklyuziv ta'lim jarayonlariga qamrab olingan. Ijtimoiy inspeksiya tomonidan mazkur ta'lim muassasalarida to'siqsiz muhitni barpo etish, infratuzilmani nogironligi bo'lgan bolalarning ehtiyojlariga moslashtirish hamda zarur jihozlar bilan to'liq ta'minlash yuzasidan muntazam ravishda o'rganish ishlari olib borilmoqda.

Amaliy yo'nalishdagi tavsiyalar

Seminar amaliy shaklda o'tkazilib, unda ishtirokchilar maktab hududi va binolarining holatini yaqindan ko'zdan kechirdilar. Mutaxassislar tomonidan kirish yo'laklari, sinf xonalari, sanitariya-gigiyena xonalari hamda boshqa zarur infratuzilma obyektlarini imkoniyati cheklangan bolalar uchun yanada qulaylashtirish yuzasidan tegishli tavsiyalar berildi. Shuningdek, tadbir doirasida soha mutaxassislari o'rtasida o'zaro tajriba almashinuvi ham tashkil etildi.

Viloyat hokimligi, Ijtimoiy inspeksiya, Ijtimoiy himoya milliy agentligi hamda Maktabgacha va maktab ta'limi boshqarmasi hamkorligida inklyuziv ta'lim muassasalarida zamonaviy va to'siqsiz muhitni shakllantirish bo'yicha tizimli ishlar izchil ravishda davom ettirilmoqda.