Jizzax viloyatida maktab va maktabgacha ta'lim tizimidagi yangi islohotlar
Jizzax viloyatida ta'lim mazmuni yangilanib, o'quvchilarni kasbga yo'naltirish, o'qituvchilar salohiyatini oshirish va infratuzilmani yaxshilash ishlari olib borilmoqda.
Ta'lim tizimining asosiy vazifasi bolaning qobiliyatini namoyon etish, mustaqil fikrlashi va hayotda o'z o'rnini topishi uchun zarur ko'nikmalarni shakllantirishdan iboratdir. Prezident Shavkat Mirziyoyevning ishtirokidagi uchrashuvlarda ta'limni rivojlantirish Yangi O'zbekistonni barpo etishning muhim bo'g'ini ekani ta'kidlandi. O'tgan davrda respublika bo'ylab millionlab o'rinli bog'cha va maktablar barpo etilib, ko'plab ta'lim muassasalari zamonaviy ko'rinishga keltirildi.
Maktablarda kasbiy ta'lim va yo'naltirish
Jizzax viloyatida ham bu borada sezilarli o'zgarishlar amalga oshirilmoqda. Xususan, 2025-2026 o'quv yilida viloyatdagi 20 ta maktabda kasbga o'qitish tizimi yo'lga qo'yilib, 11-sinfning 914 nafar o'quvchisi ishchi kasblar va axborot texnologiyalari yo'nalishlariga jalb etildi. O'quv yili yakunida 397 nafar bitiruvchiga elektron kasbiy sertifikatlar topshirildi. 2026-2027 o'quv yilidan boshlab maktabgacha va maktab ta'limi tashkilotlarida uzluksiz kasbga yo'naltirish dasturlari boshlanadi. Unga ko'ra, 5 yoshlilar uchun "Atrofimizdagi kasblar", boshlang'ich sinflarda "Kasblar alifbosi", 5-6-sinflarda "Kasblar olami" hamda 7-9-sinflarda "Mening kelajakdagi kasbim" dasturlari joriy etiladi.
Infratuzilma va moddiy-texnik baza
Viloyatda 2023-2026-yillarda maktab va bog'chalarni qurish, rekonstruksiya qilish va ta'mirlashga 654 milliard 979 million 300 ming so'm mablag' ajratilib, 180 ta ob'ektda, jumladan, 160 ta maktab va 20 ta maktabgacha ta'lim tashkilotida ishlar bajarildi. 2023-yilda 11 ta maktabda 2670 ta o'quvchi o'rni yaratilgan bo'lsa, keyingi yillarda bu ko'rsatkich bosqichma-bosqich oshib bord. Shuningdek, maktabgacha ta'lim yo'nalishida ham qator ob'ektlarda qurilish va rekonstruksiya ishlari bajarilib, jami 1290 ta bola o'rni yaratildi.
Pedagoglar salohiyati va dars jarayoni
O'qituvchilarning kasbiy salohiyatini oshirishga alohida e'tibor qaratilmoqda. Umumta'lim maktablarida oliy ma'lumotli o'qituvchilar ulushi 2 foizga oshdi, oliy va birinchi malaka toifali pedagoglar ulushi 34 foizga yetdi. Respublika miqyosida xalqaro va milliy sertifikat olgan o'qituvchilar soni 143 ming nafarga yetdi, maktablarda o'qituvchi yetishmasligi uch barobar kamaydi. 2025-2026 o'quv yilida 164 ta maktabda yangi baholash tizimi sinovdan o'tkazilgan bo'lsa, yangi o'quv yilidan bu maktablar soni 314 taga yetkaziladi. Shuningdek, chet eldan mutaxassislar jalb etilib, 100 ta maktabda matematika, informatika va tabiiy fanlarni ingliz tilida o'qitish rejalashtirilgan.
Viloyatda OTMlarga kirishning o'rtacha bali 92 ballni tashkil etib, avvalgiga nisbatan 20,2 ballga oshdi va davlat OTMlariga kirish ko'rsatkichi bo'yicha hudud respublikada uchinchi o'rinni egalladi. Xususiy maktablar soni 18 taga yetkazildi, inklyuziv ta'lim sharoitlari kengaytirilib, maxsus resurs maktablari tajribasi hududlarga joriy etilmoqda.
Manba: UzA
