Prezident o'qituvchi va murabbiylarni kasb bayrami bilan tabrikladi

Prezident Shavkat Mirziyoyev 1-oktabr - O'qituvchi va murabbiylar kuni munosabati bilan soha vakillariga tabrik yo'lladi. Davlat rahbari o'z hayotini yosh avlod tarbiyasiga bag'ishlagan barcha pedagoglarga minnatdorlik bildirib, Uchinchi Renessans poydevorini fidoyi ustozlarning faoliyati, kasb mahorati va qalb saxovatida ko'rishini ta'kidladi. Tabrikda maktab kelajak bog'i bo'lsa, muallim shu maskanda umid nihollarini o'stiradigan mohir bog'bon ekani qayd etildi.

Ta'lim sohasidagi islohotlar va rag'batlantirish

Prezident so'nggi o'n yilda ta'lim sohasida amalga oshirilgan o'zgarishlarga to'xtaldi. Hozir mamlakatda 40 ming o'qituvchi 1 ming dollar, ularning 1,5 ming nafari esa 2 ming dollardan ziyod maosh olmoqda. Joriy yil yangi formatda o'tkazilgan «Yil o'qituvchisi» tanlovining 208 nafar tuman va shahar bosqichi g'oliblariga ilk bor 616 million so'mdan mukofot berildi. Kelgusi yildan bunday rag'batlantirish mexanizmlari bog'cha tarbiyachilari va texnikum ustalari uchun ham joriy etiladi. Shuningdek, ilg'or pedagoglarni rag'batlantirish maqsadida Abdulla Avloniy nomidagi davlat mukofoti ta'sis etilishi ma'lum qilindi.

So'nggi o'n yilda O'zbekistonda 1,8 million o'rinli bog'cha va 1,5 million o'rinli maktablar barpo etildi, 10 mingdan ziyod bog'cha va maktab zamonaviy ko'rinishga keltirildi. Ixtisoslashgan va ijod maktablari tashkil etildi. Oliy ta'lim muassasalari soni 77 tadan 205 taga ko'payib, oliy ta'lim bilan qamrov 45 foizga yetdi.

O'quvchilarning xalqaro yutuqlari

Davlat rahbari o'quvchilarning xalqaro maydondagi natijalariga ham e'tibor qaratdi. 2026-yilda o'zbekistonlik o'quvchilar xalqaro olimpiadalarda 228 ta medal qo'lga kiritdi. O'quvchilik davrida xorijiy til va fan sertifikatiga ega bo'lgan yoshlar soni 100 ming nafarga yetdi, qariyb 5 ming maktab bitiruvchisi oliygohlarga kirishda eng yuqori ball to'pladi. PISA reytingida 15 yoshli o'zbekistonlik o'quvchilar tabiiy fanlarni o'zlashtirish bo'yicha 32 pogona yuqorilab, 48-o'rinni egallagani qayd etildi. Oliygohlardagi 185 ta ta'lim dasturi xalqaro akkreditatsiyadan o'tgan, xorijiy universitetlar bilan hamkorlikda 441 ta qo'shma ta'lim dasturi yo'lga qo'yilgan.

Prezident kelgusi o'n yil O'zbekiston uchun milliy yuksalis davri sifatida belgilanganini ta'kidlab, uning tayanch asosi maktab, texnikum va oliygohlar bo'lishini bildirdi.