Jizzaxda V Ustozlar milliy forumi ta'lim sifatini oshirish masalalariga bag'ishlandi
Jizzax shahrida yangi o'quv yili oldidan o'tkazilgan V Ustozlar milliy forumida ta'lim sifatiga ta'sir ko'rsatuvchi omillar va pedagoglar malakasini oshirish masalalari muhokama qilindi.
Jizzax shahridagi Prezident maktabida "Sifatli ta'lim — Yangi O'zbekiston taraqqiyotining mustahkam poydevori" shiori ostida V Ustozlar milliy forumi bo'lib o'tdi. Unda viloyatning 200 nafardan ortiq tashabbuskor pedagoglari qatnashdi. Mazkur tadbirda e'tibor faqatgina alohida fanlarni o'qitish metodikasiga emas, balki ta'lim sifatini belgilovchi barcha omillarga kompleks yondashishga qaratildi.
Ilg'or tajribalar va amaliy mashg'ulotlar
Forum doirasida mentorlar rahbarligida sho'ba mashg'ulotlari, amaliy seminarlar hamda mahorat darslari tashkil etildi. Unda zamonaviy pedagogik yondashuvlar, innovatsion metodlar va yangi o'quv yilidagi ustuvor vazifalar ko'rib chiqildi. Jizzax viloyati Maktabgacha va maktab ta'limi boshqarmasi boshlig'i vazifasini bajaruvchi Shohida Damanovaning ta'kidlashicha, ta'lim sifati bevosita o'qituvchining kasbiy salohiyatiga tayanadi va ustozning uzluksiz rivojlanishi muhim jarayondir.
Tadbir davomida olingan bilim va ko'nikmalarni hududlardagi maktablarga yetkazish mexanizmi ham muhokama qilindi. Jizzax shahridagi 3-umumiy o'rta ta'lim maktabining o'quv ishlari bo'yicha direktor o'rinbosari Zebo Sanaqulova respublika forumida o'zlashtirilgan tajribalar mahalliy o'qituvchilar bilan bo'lishish orqali yuzlab sinfxonalarga kirib borishini ta'kidladi. Jizzax viloyati Maktabgacha va maktab ta'limi boshqarmasi bo'lim bosh metodisti Dilorom Rasulova esa sifatni faqat bitta metodika bilan ta'minlab bo'lmasligi, buning uchun maktab muhiti, rahbarlik madaniyati va darsliklardan samarali foydalanish kabi qator jihatlar muhimligini qayd etdi.
Yangi o'quv yiliga tayyorgarlik va birinchi sinflar
Forum doirasida uyushtirilgan press-tur ishtirokchilari Jizzax shahridagi 19-umumiy ta'lim maktabida yangi o'quv yiliga ko'rilayotgan hozirlik ishlari bilan tanishdilar. Mazkur ta'lim dargohida 3 ming 710 nafar o'quvchi o'qydi va yangi o'quv yilida birinchi sinfga 140 nafar bolani qabul qilish rejalashtirilgan.
Ma'lumotlarga ko'ra, joriy o'quv yilida viloyatdagi 571 ta umumta'lim maktabining birinchi sinfiga 34 ming 523 nafar bolani qabul qilish ko'zda tutilgan. Ularning barchasi uchun o'quv qurollari va bayram esdaliklari jamlangan "Prezident sovg'alari" yetkazib berildi. Shuningdek, press-tur davomida yangi darslik majmualarining mazmun-mohiyati va ulardan foydalanish imkoniyatlari yuzasidan mutaxassislar ma'lumot berishdi.
Manba: UzA
