Jizzaxdagi maktablarda “Yashil makon” loyihasi doirasida ekologik aksiya boshlandi
Jizzax viloyatida rahbarlar o'zlari o'qigan maktablarga tashrif buyurib, “Mening maktabim — obod maktab” g'oyasi ostida ko'chat ekishdi.
Mamlakatimizda olib borilayotgan “Yashil makon” umummilliy loyihasi doirasida tabiatni asrash va yashil maydonlarni ko'paytirish ishlari yangi bosqichga ko'tarilmoqda.
Jozibali tashabbus doirasida Jizzax viloyatida ibratli tadbir tashkil etildi. Unga ko'ra, viloyat Yoshlar ishlari boshqarmasi boshlig'i hamda tuman va shahar bo'limlari rahbarlari o'zlari tahsil olgan umumiy o'rta ta'lim maktablariga borib, ko'chat ekish ishlarida shaxsan qatnashishdi.
Ushbu tadbirlarga “Mening maktabim — obod maktab” g'oyasi asos qilib olingani e'tiborga molik. Inson yuragida tabiatga nisbatan muhabbat va mas'uliyat hissi aynan bolalik xotiralari bilan birgalikda shakllanadi.
Rahbarlarning o'z maktablarida nihollar o'tqazishi o'quvchilar uchun amaliy o'rnak vazifasini o'tamoqda. Bu kabi ezgu ishlar hududlardagi yashillik ko'lamini kengaytirish bilan bir qatorda, yosh avlodning ekologik ongi va fuqarolik mas'uliyatini yanada mustahkamlashga xizmat qiladi. Mutaxassislarning fikricha, bunday sa'y-harakatlar jamiyatda tabiatga hurmat madaniyatini shakllantirishda muhim ahamiyat kasb etadi.
Manba: UzA
