Maktabgacha va maktab ta'limi vazirligi Ochiqlik indeksida yuqori natija qayd etdi

Korrupsiyaga qarshi kurashish agentligi tomonidan 2025-yilda davlat organlari va tashkilotlarida ochiqlik sohasidagi ishlar samaradorligini baholovchi Ochiqlik indeksi yakunlari ma'lum qilindi. Mazkur baholash jarayonida respublika miqyosidagi jami 86 ta ijro etuvchi hokimiyat organi, jumladan vazirliklar, qo'mita, agentlik, inspeksiyalar hamda mahalliy hokimiyat idoralari faoliyati qamrab olindi.

E'lon qilingan natijalarga ko'ra, Maktabgacha va maktab ta'limi vazirligi 82,6 ball to'plab, yashil samaradorlik ko'rsatkichi bilan yuqori o'rinni egalladi. Shuningdek, mazkur vazirlik huzuridagi Ixtisoslashtirilgan ta'lim muassasalari agentligi ham 73,3 ball natijani qayd etishga muvaffaq bo'ldi.

Shaffoflik va jamoatchilik nazorati

Mutaxassislarning ta'kidlashicha, mazkur ko'rsatkichlar davlat idoralari faoliyatida shaffoflikni yanada oshirishda muhim ahamiyat kasb etadi. Shuningdek, bu natijalar jamoatchilik nazoratini kuchaytirish hamda fuqarolarning ochiq ma'lumotlardan foydalanish imkoniyatlarini kengaytirish yo'lidagi amaliy qadamlardan biri hisoblanadi.