Muzrabot tumanida yangi o'quv binosiga ega zamonaviy maktab foydalanishga topshirildi

Surxondaryo viloyatining Muzrabot tumani Mehnatobod mahallasidagi 3-umumta'lim maktabining 180 o'rinli yangi o'quv binosi foydalanishga topshirildi. Yangi ta'lim muassasasining ochilish marosimida tuman hokimi Abdulla Mamatqulov ishtirok etib, mamlakatda ta'lim sohasiga qaratilayotgan e'tibor yoshlarning sifatli ta'lim olishida muhim omil ekanini ta'kidladi. Shu bilan birga, yangi qiyofadagi maktablar barpo etilishi va o'qituvchilarmehnati rag'batlantirilayotgani qayd etildi.

Ta'lim jarayoni va sharoitlar

Bugungi kunda mazkur ta'lim maskanida 320 nafar o'quvchiga 40 nafarga yaqin malakali o'qituvchi hamda murabbiy saboq bermoqda. Ta'lim muassasasi binosi "Chiroy Muzrabot qurilish" xususiy korxonasi quruvchilari tomonidan zamonaviy qiyofada bunyod etilgan bo'lib, o'quvchilar va ustozlar uchun barcha sharoitlar muhayyo qilingan. Keng hamda yorug' o'quv xonalari zarur jihozlar bilan to'liq ta'minlandi.

Tuman miqyosidagi rejalar

joriy yilda Muzrabot tumanida jami oltita umumta'lim maktabi binosini tubdan rekonstruksiya qilish rejalashtirilgan. Shuningdek, tumanda 9 ta davlat maktabgacha ta'lim tashkiloti ham qurilmoqda.