Namangan shahrida ming o'rinli zamonaviy xususiy maktab ish boshladi
Yangi Namangan tumanida qiymati 8 milliard so'mlik 1000 o'rinli "NOVDA SCHOOL" xususiy maktabi foydalanishga topshirildi.
Mustaqillikning 35 yilligi bayrami arafasida Namangan viloyatida bir qator ijtimoiy ob'ektlar qatorida yangi ta'lim muassasasi ham ochildi. Yangi Namangan tumanining Mehnatobod mahallasida barpo etilgan "NOVDA SCHOOL" xususiy maktabi shular jumlasidandir.
Ta'lim dargohining imkoniyatlari
Qiymati 8 milliard so'mni tashkil etuvchi mazkur zamonaviy ta'lim maskani 1000 nafar o'quvchini qabul qilish imkoniyatiga ega. Uch qavatli va zamonaviy arxitektura asosida qurilgan bino o'quvchilarning sifatli ta'lim olishi uchun zarur shart-sharoitlar bilan ta'minlandi.
Maskanda zamonaviy jihozlangan o'quv sinflari, oshxona va olis hududlardan qatnab o'qiydigan bolalar uchun maxsus yotoqxona tashkil etilgan.
Tantanali ochilish marosimida Namangan viloyati hokimi Shavkat Abdurazzoqov, jamoatchilik vakillari hamda nuroniylar qatnashdi. Tadbirda ushbu ta'lim maskani yosh avlodning salohiyatini ro'yobga chiqarish va sifatli bilim olishida muhim ahamiyat kasb etishi ta'kidlandi.
Manba: UzA
