Toshkentda o'tkaziladigan 58-Xalqaro kimyo olimpiadasiga tayyorgarlik yakuniy bosqichda
Toshkent shahrida o'tadigan 58-Xalqaro kimyo olimpiadasiga tayyorgarlik ishlari ko'zdan kechirildi.
Joriy yilning 10-19-iyul kunlari poytaxtimiz Toshkent shahri dunyoning eng nufuzli fan musobaqalaridan biri bo'lgan 58-Xalqaro kimyo olimpiadasi (IChO 2026)ga mezbonlik qiladi. Mazkur nufuzli xalqaro olimpiadaga O'zbekiston ilk bor mezbonlik qilmoqda va bu tarixiy tadbir mamlakatimizning ilm-fan hamda ta'lim sohasidagi salohiyatini xalqaro maydonda yana bir bor namoyon etishga xizmat qiladi.
Tayyorgarlik jarayonlari o'rganildi
Musobaqaga tayyorgarlik jarayonlarini ko'zdan kechirish maqsadida Prezident Administratsiyasi rahbarining ta'limni isloh qilish bo'yicha o'rinbosari Ilhom Sirojev, Maktabgacha va maktab ta'limi vaziri E'zoza Karimova hamda Oliy ta'lim, fan va innovatsiyalar vaziri Qo'ng'irotboy Sharipov olimpiadaning amaliy bosqichi o'tkaziladigan Mirzo Ulug'bek nomidagi O'zbekiston Milliy universitetida bo'lishdi.
Tashrif davomida mas'ullar quyidagi yo'nalishlarni yaqindan o'rganib chiqishdi:
- Laboratoriyalar holati va jihozlanishi
- Amaliy imtihon xonalari tayyorgarligi
- Ishtirokchilar uchun yaratilgan sharoitlar
- Olimpiadani xalqaro standartlar asosida yuqori saviyada tashkil etish yuzasidan amalga oshirilayotgan oxirgi chora-tadbirlar
O'rganishlar yakunida amaliy sinovlarni xalqaro talablar asosida o'tkazish hamda barcha tashkiliy masalalarni belgilangan muddatlarda to'liq yakunlash bo'yicha mas'ullarga tegishli tavsiyalar berildi.
Manba: UzA
