Nukusda “El-yurt umidi” jamg'armasi kunlari doirasida targ'ibot seminarlari o'tkazildi

Ajiniyoz nomidagi Nukus davlat pedagogika institutida O'zbekiston Respublikasi Prezidenti huzuridagi Istiqbolli kadrlarni tayyorlash bo'yicha “El-yurt umidi” jamg'armasi tomonidan targ'ibot seminari tashkil etildi. Ushbu tadbir mamlakatimiz hududlarida xalqaro ta'lim dasturlarini ommalashtirish, iqtidorli yoshlarni global akademik hamjamiyatga jalb etish va inson kapitalini mustahkamlashga qaratilgan “El-yurt umidi” jamg'armasi kunlari doirasida o'tkazildi.

Tadbirda Qoraqalpog'iston Respublikasi Vazirlar Kengashi, jamg'arma hamda Maktabgacha va maktab ta'limi vazirligi vakillari, oliy ta'lim muassasalari talabalari, maktablarning bitiruvchi sinf o'quvchilari va mas'ullari, yoshlar yetakchilari va davlat xizmatchilari qatnashdi.

Yangi yondashuvlar va imkoniyatlar

Ma'lum qilinishicha, “El-yurt umidi” jamg'armasi 2018-yilda o'z faoliyatini boshlagan. Davlat rahbarining 2025-yil 5-maydagi “Iqtidorli mutaxassislarning xorijda ta'lim olishini qo'llab-quvvatlash, ularda kasbiy ko'nikmalarini rivojlantirish va rag'batlantirishga oid qo'shimcha chora-tadbirlar to'g'risida”gi farmoni asosida jamg'arma faoliyati yangi yondashuvlar asosida qayta tashkil etilgan. Bugungi kunda uning asosiy maqsadi dunyoning yetakchi universitetlari va ilmiy markazlarida tahsil oladigan, zamonaviy bilim va ko'nikmalarni egallaydigan yangi avlod kadrlarini tayyorlashdan iborat.

Uchrashuvda mas'ul xodimlar jamg'arma faoliyati va farmonda belgilangan vazifalar xususida so'zlab berdi. Shuningdek, ochiq stipendiya tanlovlarini o'tkazish tartibi hamda nomzodlarga qo'yiladigan talablar tushuntirildi. Stipendiatlar xorijda o'qishni tamomlagach, ularni mamlakatimizda munosib ishga joylashtirish, mansab pog'onalarida ko'tarish va Milliy kadrlar zaxirasiga kiritish masalalari yuzasidan ma'lumot berildi.

Teng imkoniyatlar tamoyili

Tadbir davomida ochiq muloqotlar va motivatsion uchrashuvlar yoshlarga jahon ta'limiga yo'l barcha uchun — yashash joyi, ijtimoiy mavqei yoki oilasining daromad darajasidan qat'i nazar — ochiqligini ko'rsatishi ta'kidlandi. Bu holat jamg'arma faoliyatining “hech kim chetda qolmasligi kerak” degan asosiy tamoyilini aks ettiradi.

• Iqtidorli maktab o'quvchilari va talabalarni qo'llab-quvvatlash;
• Xotin-qizlar va kam ta'minlangan oilalar farzandlari uchun sifatli ta'limga kirish imkoniyatlarini kengaytirish;
• Davlat xizmatchilari uchun sharoitlar yaratish.

Ma'lum qilinishicha, shunga o'xshash targ'ibot seminarlari Nukus shahridagi Prezident maktabida hamda Chimboy tumani hokimligida ham tashkil etildi.