Olmaliqda inklyuz va maxsus ta'lim milliy forumi o'tkazildi

Olmaliq shahar 11-sonli ko'p tarmoqli maktab-internatida inklyuziya va maxsus ta'lim milliy forumining viloyat bosqichi bo'lib o'tdi. Tadbirda Ijtimoiy himoya milliy agentligi Toshkent viloyati boshqarmasi vakillari, ta'lim mutaxassislari, o'qituvchilar va forum ishtirokchilari qatnashdi.

Tadbir davomida alohida ta'lim ehtiyojlari bo'lgan bolalar uchun teng imkoniyatlar yaratish, ta'lim sifatini oshirish hamda maxsus ta'limni rivojlantirish masalalari muhokama qilindi. Mehmonlar dastlab maktab-internatdagi shart-sharoitlar, o'quv jarayoni va zamonaviy jihozlar bilan tanishdi. Shundan so'ng ishtirokchilar guruhlarga bo'linib, amaliy mashg'ulotlar va darslarda qatnashdi.

Amaliy mashg'ulotlar va muhokamalar

Mashg'ulotlar davomida o'quvchilarning individual imkoniyatlarini hisobga olish, samarali pedagogik yondashuvlardan foydalanish hamda zamonaviy va innovatsion ta'lim metodlarini amaliyotga tatbiq etish masalalari ko'rib chiqildi. Olmaliq shahar 11-sonli ko'p tarmoqli maktab-internati o'qituvchisi Sitora Ergashevaning ta'kidlashicha, forum ishtirokchilari o'zaro tajriba almashib, kelgusidagi hamkorlik yo'nalishlarini belgilab oldi.

Bunday muloqotlar pedagoglarning kasbiy salohiyatini yuksaltirishga va ilg'or tajribalarni ommalashtirishga xizmat qiladi. Forum yakunida bildirilgan takliflar alohida ta'lim ehtiyojlari bo'lgan bolalarning sifatli ta'lim olish imkoniyatlarini kengaytirish hamda ularning jamiyatdagi faol ishtirokini ta'minlashga yo'naltirilishi ta'kidlandi.