O'qituvchilar uchun davlat xizmatlarida chegirmalar va yangi majburiyatlar belgilandi
Hukumat qarori bilan ta'lim tashkilotlari pedagoglari uchun davlat xizmatlari narxi 50 foizga arzonlashdi va rahbarlar uchun o'quv kurslari joriy etildi.
Hukumatning 2026 yil 16 apreldagi 175-son qarori bilan ayrim normativ-huquqiy hujjatlarga o'zgartirish va qo'shimchalar kiritildi. Yangi tartibga ko'ra, ta'lim tashkilotlarida mehnat shartnomasi asosida faoliyat yurituvchi pedagog shaxslar uchun bir qator davlat xizmatlari narxi xizmatlar umumiy qiymatining 50 foizini tashkil qilishi belgilandi.
Davlat xizmatlaridagi imtiyozlar
Mazkur imtiyoz ko'chmas mulk kadastriga oid xizmatlar, muhandislik-kommunikatsiya tarmoqlariga ulanish, umumta'lim fanlarini bilish darajasini aniqlash va sertifikatlashtirish, traktorchi-mashinist guvohnomasi uchun imtihonga ruxsat olish, shuningdek, rasmiy hujjatlarga apostil qo'yish kabi xizmatlarga tatbiq etiladi.
Rahbar xodimlar uchun yangi talablar
Shu bilan birga, ixtisoslashtirilgan maktablar va maktab-internatlar rahbar xodimlari har 5 yilda bir marta ishdan ajralgan holda Madaniyat vazirligi tomonidan tashkil etiladigan menejerlik o'quv kurslarida ishtirok etishi belgilandi.
Bundan tashqari, ixtisoslashtirilgan ta'lim muassasalarida o'quvchilarni o'qishdan chetlashtirish, boshqa yo'nalishga o'tkazish va o'qishini ko'chirish tartibi ham aniq belgilab berildi.
Manba: Kun.uz
