Orolbo'yida o'qituvchi va murabbiylar kuni munosabati bilan bayram tadbiri o'tkazildi

Berdaq nomidagi Qoraqalpoq davlat akademik musiqa teatrida 1-oktabr – O'qituvchi va murabbiylar kuni munosabati bilan tantanali bayram tadbiri tashkil etildi. Unda Qoraqalpog'iston Respublikasi Jo'qorg'i Kengesi raisi Amanbay Orinbayev yig'ilganlarni kasb bayrami bilan tabrikladi.

Tadbirda oxirgi yillarda mamlakatda ta'lim sohasida amalga oshirilayotgan islohotlar, erishilayotgan natijalar va oldindagi vazifalarga alohida e'tibor qaratildi. Xususan, sohadagi o'zgarishlar jamiyatda o'qituvchilarning o'rnini oshirishga xizmat qilayotgani ta'kidlandi.

Ta'lim sohasidagi ko'rsatkichlar va yutuqlar

Ma'lum qilinishicha, o'tgan 5 yilga nisbatan toifalangan o'qituvchilar soni 3 yarim barobarga ko'paygan. Shuningdek:

• milliy sertifikat olgan pedagoglar soni 207 nafardan 13 ming nafarga yetdi;
• xalqaro sertifikatga ega o'qituvchilar 4 yarim ming nafarga oshdi;
• joriy yilning o'zida 15 nafar o'qituvchi Germaniya, Fransiya, Turkiya, Ozarbayjon va Xitoyga borib malaka oshirib qaytdi;
• "Yil o'qituvchisi" tanlovida g'olib bo'lgan 17 nafar o'qituvchining har biri 616 million so'mdan moddiy rag'batlantirildi;
• bayram munosabati bilan 7 nafar fidoyi ustoz davlat mukofotlariga munosib topildi.

O'quvchi va yoshlarning muvaffaqiyatlari

Qoraqalpog'istonlik yoshlarning ta'lim va boshqa yo'nalishlardagi yutuqlari ham e'tirof etildi. Jumladan, 2025-2026 o'quv yilida 450 nafar o'quvchi muddatidan oldin talaba bo'lgan. Asosiy fan olimpiadalarining Respublika bosqichida o'quvchilar jamoaviy hisobda so'nggi ikki yilda ikkinchi o'rinni egallab kelayotgan bo'lsa, xalqaro fan olimpiadalarida 7 ta sovrinli o'rin qo'lga kiritildi.

Tadbir yakunida Qoraqalpog'iston Respublikasi Jo'qorg'i Kengesi Prezidiumi qarori bilan bir guruh soha fidoyilariga ko'krak nishonlari, Faxriy yorliq hamda rag'batlantiruvchi mukofotlar tantanali ravishda topshirildi. Bayram san'at va madaniyat xodimlari ijrosidagi konsert dasturi bilan davom etdi.