Prezident asarlari va kitob-albomlari Harvard universiteti kutubxonasiga topshirildi
O'zbekiston delegatsiyasining AQShga tashrifi doirasida Harvard universitetiga Prezident asarlari va kitob-albomlari taqdim etildi.
Oliy Majlis huzuridagi Fuqarolik jamiyati institutlarini qo'llab-quvvatlash jamoat fondi, Barqaror rivojlanish markazi, Toshkent shahar xotin-qizlarni qo'llab-quvvatlash markazi hamda xalqaro Business Diplomat missiyasi vakillaridan iborat delegatsiya AQShga safari doirasida Harvard universitetida bo'ldi. Safar davomida delegatsiya a'zolari mazkur oliy ta'lim muassasasining faoliyati bilan tanishishdi.
Tashrif doirasida O'zbekiston Respublikasi Prezidenti Shavkat Mirziyoyevning ingliz tilida chop etilgan "Yangi O'zbekistonning "yashil" taraqqiyot yo'li" kitobi, "Shavkat Mirziyoyev — jahon miqyosidagi davlat va siyosat arbobi", "Mustaqillik zafarnomasi" hamda "Yangi O'zbekiston: tinchlik, insonparvarlik va bag'rikenglik diyori" nomli kitob-albomlari universitet kutubxonasiga topshirildi.
Ilmiy-ma'rifiy aloqalarni kengaytirish yo'lidagi qadam
Ta Taqdim etilgan nashrlarda mamlakatimizda amalga oshirilayotgan islohotlar, ekologik barqarorlik va "yashil" taraqqiyot borasidagi tashabbuslar, tashqi siyosat, mustaqillik yillaridagi rivojlanish yo'li hamda boy madaniy merosga oid ma'lumotlar o'rin olgan.
Harvard universitetining noyob kitoblar va qo'lyozmalarga ixtisoslashgan Xouton kutubxonasi (Houghton Library) vakili Kristina Jeykobson (Christine Jacobson) mazkur nashrlar O'zbekiston haqidagi bilimlarni xalqaro akademik muhitda kengaytirishga xizmat qilishini alohida ta'kidlab o'tdi. Ushbu tashabbus O'zbekiston va xorijiy ilmiy-ma'rifiy muassasalar o'rtasidagi hamkorlik aloqalarini mustahkamlashga qaratilgan.
Manba: UzA
