Qiziltepa tumanidagi «Nurli bolajon» xususiy bog'chasi faoliyati bilan tanishing
Navoiy viloyati Qiziltepa tumanidagi «Nurli bolajon» xususiy maktabgacha ta'lim tashkilotida tarbiyalanuvchilar soni 100 nafarga yetdi.
Bog'cha faoliyati va shart-sharoitlar
Navoiy viloyati Qiziltepa tumanida faoliyat yuritayotgan «Nurli bolajon» xususiy maktabgacha ta'lim tashkiloti bolalarni har tomonlama barkamol etib tarbiyalashga yo'naltirilgan zamonaviy maskanlardan biri hisoblanadi. Mazkur muassasa 2024-yilda ish boshlagan bo'lib, dastlab 50 nafar bolaga mo'ljallangan edi. Hozirgi kunga kelib esa bu yerda tarbiyalanuvchilar soni 100 nafarga yetkazildi.
Mashg'ulotlar va to'garaklar
Tashkilotda tajribali hamda malakali pedagoglar tomonidan bolalarning intellektual va ijodiy salohiyatini oshirishga alohida e'tibor qaratilmoqda. Xususan, tarbiyalanuvchilar uchun ingliz tili, kompyuter savodxonligi, mental arifmetika, savod chiqarish, o'qish va yozish, musiqa, shuningdek, jismoniy tarbiya va sport mashg'ulotlari o'tkazib kelinmoqda. Buning tashqari, defektolog ishtirokida har bir bola bilan yakka tartibda korreksion mashg'ulotlar ham olib borilmoqda.
Muassasada bolalarning bo'sh vaqtini mazmunli tashkil etish maqsadida shashka-shaxmat va raqs to'garaklari ham faoliyat yuritmoqda.
Salomatlik va parvarish
Tarbiyalanuvchilarning salomatligini mustahkamlash va chiniqtirishga alohida ahamiyat qaratiladi. Shu maqsadda muassasada fizioterapiya va massaj tadbirlari muntazam tashkil etiladi. Shuningdek, bolalarni to'yimli hamda vitaminlarga boy oziq-ovqatlar bilan ta'minlash ularning sog'lom o'sishi va rivojlanishiga xizmat qilmoqda.
Manba: UzA
