Samarqandda 2026/2027 o'quv yili uchun test sinovlari boshlandi

Respublika bo'ylab bo'lgani kabi Samarqand viloyatida ham 2026-2027 o'quv yili uchun davlat oliy va kasbiy ta'lim muassasalariga kirish test sinovlari o'z ishini boshladi.

Bilim va malakalarni baholash agentligi Samarqand viloyati bo'limi ma'lumotlariga ko'ra, joriy yilda viloyatda 71848 nafar abituriyent imtihonlarda qatnashishi belgilangan. Jarayonlarni yuqori saviyada o'tkazish uchun agentlikning viloyat bo'limi hamda oliy ta'lim muassasalarining katta sig'imdagi oltita binosida barcha sharoitlar muhayyo etildi. Mazkur maskanlarda bir vaqtning o'zida bitta navbatda 4110 nafar yosh test topshirish imkoniyatiga ega. Barcha imtihon binolari havo haroratini mo'tadil saqlash uchun konditsionerlar bilan jihozlandi. Shuningdek, har bir abituriyentga 0,5 litr hajmdagi ichimlik suvi va sharikli ruchka tarqatildi.

Imtihon jarayonlari va sharoitlar

Sinovlar kun davomida ikki navbatda tashkil etilmoqda. Xususan, birinchi navbat ertalab soat 8:00 dan 11:00 gacha davom etgan bo'lsa, ikkinchi navbat 15:00 dan 18:00 gacha o'tkazilib, unda 4000 nafardan ziyod yigit-qizlar o'z bilimlarini sinovdan o'tkazdi.

Abituriyentlar uchun yaratilgan imkoniyatlar qatorida shaffoflikni ta'minlash masalasiga ham alohida e'tibor qaratilgan. Sinov jarayonlari to'liq videokuzatuv ostida olib borilib, test2026.uz sayti orqali onlayn tarzda translyatsiya qilinmoqda. Ota-onalar va abituriyentlarning yaqinlari jarayonni internet tarmog'i hamda maxsus katta monitorlar yordamida bevosita kuzatib borishmoqda. Qolaversa, sinov o'tkazilayotgan binolar atrofida ham ota-onalar uchun barcha qulayliklar yaratilgan.