Qoraqalpog'istonda abituriyentlar uchun kirish test sinovlari qanday o'tmoqda

Qoraqalpog'iston Respublikasida 2026-2027 o'quv yili uchun davlat oliy ta'lim muassasalarining bakalavriat yo'nalishlariga kirish test sinovlari yuqori darajadagi tashkiliy tayyorgarlik bilan o'tkazilmoqda. Joriy yilning 14-iyul kuni boshlangan sinovlar 23-iyulga qadar davom etishi belgilangan bo'lib, ular har kuni ikki smenada tashkil etilmoqda. Birinchi smena soat 08:00 dan 11:00 gacha, ikkinchi smena esa 15:00 dan 18:00 gacha davom etmoqda.

Imtihonlarni ochiqlik, shaffoflik va adolat tamoyillari asosida o'tkazish, shuningdek, barcha abituriyentlarga teng imkoniyatlar yaratishga alohida e'tibor qaratilmoqda. Jarayonlar belgilangan talablar asosida yo'lga qo'yilib, jamoatchilik nazorati va zamonaviy mexanizmlar orqali uning xolisligi ta'minlanmoqda.

Abituriyentlar va ota-onalar uchun qulayliklar

Samarqand davlat veterinariya meditsinasi, chorvachilik va biotexnologiyalar universiteti Nukus filiali jamoasi Bilim va malakalarni baholash agentligining Qoraqalpog'iston Respublikasi bo'limida o'tkazilayotgan sinovlar davomida abituriyentlar hamda ularning ota-onalari uchun keng ko'lamli ko'mak ko'rsatdi. Xususan, imtihonga kiruvchilarning shaxsiy buyumlarini xavfsiz saqlash uchun maxsus hudud tashkil etilib, buyumlar to'liq qabul qilindi va sinov yakunida egalariga qaytarildi.

Filial xodimlari va ko'ngilli talabalar abituriyentlarga ruxsatnomalarni chop etishda ko'maklashdi, ularga test tartibi va qoidalari bo'yicha tushuntirishlar berdi. Ota-onalar uchun ham qulay kutish hududlari yaratilib, ular onlayn kuzatuv tizimlari orqali farzandlarining imtihon jarayonini real vaqt rejimida kuzatib borish imkoniyatiga ega bo'ldi.

Shuningdek, ota-onalarga filialdagi ta'lim muhiti, laboratoriyalar, talabalar turar joyi, axborot-resurs markazi va xalqaro hamkorlik yo'nalishlari haqida batafsil ma'lumotlar berilib, targ'ibot materiallari tarqatildi.