Samarqandda amaldorlarning farzandlari xalqaro bayramga nohaq yuborilgani aniqlandi

Rossiyaning Sankt-Peterburg shahrida o'tkaziladigan an'anaviy “Alvon yelkanlar” (“Alyye parusa”) bayramida O'zbekiston maktab o'quvchilarining ham ishtiroki rejalashtirilgan edi. Rossiya tomonining rasmiy taklifiga asosan, 2025 yil 28 iyun kuni bo'lib o'tadigan tadbirda Samarqand viloyatidan 9-11-sinf o'quvchilaridan iborat delegatsiya qatnashishi ko'zda tutilgan.

Ishtirokchilar uchun qo'yilgan talablar va kelishish jarayoni

O'zbekiston Tashqi ishlar vazirligi bu taklifni tegishli viloyat va shahar hokimliklariga yetkazgan. Bunda ishtirokchilar ro'yxatini shakllantirish bo'yicha muhim tavsiya berilib, ta'limda yuqori natija ko'rsatib kelayotgan, milliy hamda xalqaro fan olimpiadalarida g'olib bo'lgan yoki faol qatnashgan o'quvchilarga ustuvorlik berilishi belgilangandi.

Shundan so'ng Samarqand viloyati Maktabgacha va maktab ta'limi boshqarmasi O'zbekiston Maktabgacha va maktab ta'limi vazirligiga murojaat qilgan. Boshqarma Rossiya tomoni ajratgan kvota doirasida 14 nafar yuqori sinf o'quvchisi va 1 nafar mas'ul xodim ro'yxatini shakllantirish uchun rozilik so'ragan. Hujjatlarga ko'ra, vazirlik roziligi olingach, mazkur ro'yxat viloyat hokimligiga taqdim etilishi lozim edi.

Aniqlangan qoidabuzarliklar

Biroq ijtimoiy tarmoqlarda tarqalgan xabarlarga ko'ra, safar ishtirokchilari ro'yxatiga iqtidorli bolalar o'rniga amaldorlarning yaqinlari kiritib yuborilgan. Xususan, Samarqand viloyati Maktabgacha va maktab ta'limi boshqarmasi rahbari Muzaffar Hamdamovning farzandi va jiyani, shuningdek, boshqarmaning ayrim bo'lim boshliqlari hamda mas'ul xodimlarining bolalari Sankt-Peterburgga borib kelgani aytilmoqda.

Ma'lum bo'lishicha, bu o'quvchilarning birortasi ham xalqaro fan olimpiadalarida qatnashmagan, hatto ba'zilari tuman yoki shahar bosqichida ham ishtirok etmagan. Dastlabki o'rganishlar davomida ularning ayrimlari maktabda yaxshi o'qimaydigan, davomati past bo'lgan tanish-bilish va qarindosh bolalar ekani aniqlangan.