Samarqandda Osiyo taraqqiyot banki yordamida bog'chalar quriladi va ta'mirlanadi

Samarqand shahrida o'tkazilgan Osiyo taraqqiyot banki Boshqaruvchilar kengashining 59-yillik yig'ilishi doirasida muhim uchrashuv bo'lib o'tdi. Unda bank mas'ullari va Samarqand viloyati hokimligi vakillari ishtirok etib, hududda maktabgacha ta'lim sohasini rivojlantirish masalalarini muhokama qildilar.

Hamkorlik yo'nalishlari va rejalashtirilgan ishlar

Xalqaro moliyaviy institutning bozorlarni rivojlantirish va davlat-xususiy sheriklik idorasi rahbari Takeo Koike hamda 1-maslahat bo'limi direktori Muhammad Azim Hoshimi bilan bo'lgan muloqotda Adiz Boboyev qariyb 100 ta maktabgacha ta'lim muassasasini davlat-xususiy sheriklik asosida loyihalashtirish, qurish, rekonstruksiya qilish va foydalanishga topshirish jarayonlarini ko'rib chiqdi.

Hozirgi vaqtda viloyatdagi 43 ta bog'chani to'liq ta'mirlash maqsadida saralash ishlari olib borilmoqda. Shuningdek, yangi bog'chalar qurilishi uchun viloyat hokimligi tomonidan qariyb 80 ta yer maydoni taklif etilishi rejalashtirilgan. Adiz Boboyev yangi ta'lim muassasalarini barpo etishda hududlarning aniq ehtiyojlarini inobatga olish muhimligini ta'kidlab, zarur yer maydonlarini puxta shakllantirish lozimligini qayd etdi.

Loyihaning amalga oshirish bosqichlari

• 2026-yilning ikkinchi choragida ikki bosqichli tender jarayoni boshlanadi;
• 2027-yilda g'olib investor bilan davlat-xususiy sheriklik shartnomasini imzolash ko'zda tutilgan;
• Qurilish ishlarini 2030-yilga qadar to'liq yakunlash rejalashtirilmoqda.

Uchrashuv yakunida tomonlar mazkur loyihani samarali amalga oshirish yo'lida o'zaro hamkorlikni yanada mustahkamlashga tayyor ekanliklarini bildirdilar.