Sirdaryo kolleji o'quvchisi xalqaro musobaqada nufuzli mukofotni qo'lga kiritdi
Shirin energetika kolleji o'quvchisi Iqbolmirzo Abdusamadov Xitoyda o'tgan xalqaro chempionatda mukofotga sazovor bo'ldi.
Xalqaro maydondagi muvaffaqiyat
O'tgan 2025 yilning 27–29 noyabr kunlari Xitoyning Taypey shahrida 22 yoshgacha bo'lgan yigit va qizlar ishtirokida WorldSkills Asia Taipei 2025 xalqaro professional mahorat chempionati bo'lib o'tdi. Ushbu nufuzli musobaqada O'zbekiston delegatsiyasi ham munosib qatnashib, mamlakat sharafini himoya qildi. Bellashuvda yurtimiz nomidan 16 ta mahorat yo'nalishi bo'yicha jami 32 nafar ishtirokchi o'zining professional bilimi va amaliy ko'nikmalarini namoyish etdi.
Nufuzli mukofot egasi
Musobaqa yakunlariga ko'ra, Sirdaryo viloyatidagi Shirin energetika kolleji o'quvchisi Iqbolmirzo Abdusamadov elektromontaj kasbi bo'yicha faol ishtiroki hamda yuqori mas'uliyati tufayli WorldSkills International tashkilotining “Millatning eng yaxshisi” mukofotiga loyiq ko'rildi. Mazkur e'tirof xalqaro maydonda o'z davlati sharafini munosib himoya qilgan va yuqori kasbiy salohiyati bilan ajralib turgan yoshlarga beriladi.
Iqbolmirzo Abdusamadov yoshligidan ustachilik va elektr energiyasi sohasiga qiziqqani, moddiy sabablar bilan chet elda ham ishlagach, xorijiy kompaniyalar hamkorligida tashkil etilgan Shirin kollejiga o'qishga kirganini ta'kidladi. Shuningdek, u kelgusida Shanxay shahrida o'tkaziladigan xalqaro bosqichda g'olib chiqsa, O'zbekiston Respublikasi Prezidentining tegishli qaroriga muvofiq 1 milliard 30 million so'm miqdoridagi mukofot puli bilan taqdirlanishi belgilangan. O'zbekiston jamoasining bu kabi yutuqlari mamlakatda kasbiy va texnik ta'lim tizimi izchil rivojlanayotganidan dalolat beradi.
Manba: UzA
