Texnikum bitiruvchilarini oliy o'quv yurtlarining ikkinchi kursiga o'qishga qabul qilish boshlandi

Arizalarni topshirish tartibi va muddati

Oliy ta'lim tashkilotlari taqdim etgan ma'lumotlarga ko'ra, texnikum bitiruvchilarini OTMning ikkinchi bosqichiga o'qishga qabul qilish uchun hujjatlar 25 iyulga qadar (shu kuni ham) onlayn shaklda qabul qilinadi. Jarayon my.edu.uz platformasi orqali amalga oshiriladi.

Ro'yxatdan o'tish paytida abituriyentlardan texnikum diplomining asl nusxasi talab etilmaydi. Faqat shaxsni tasdiqlovchi ma'lumotlarni kiritishning o'zi kifoya qiladi, qolgan zarur ma'lumotlar esa axborot tizimi tomonidan avtomatik shakllantiriladi.

Talabgorlarga qo'yiladigan baholar talablari

Mazkur tartib faqatgina texnikumni muvaffaqiyatli tamomlagan bitiruvchilarga tatbiq etiladi. Bunda o'qish davomida barcha semestrlar bo'yicha baholari asosan 4 («yaxshi») va 5 («a'lo») bo'lgan, shuningdek, baholarining kamida 50 foizi «a'lo»ni tashkil etgan bitiruvchilar ushbu imkoniyatdan foydalanishi mumkin. Tibbiyot yo'nalishlari bo'yicha esa bu ko'rsatkich kamida 85 foizni tashkil etishi talab etiladi.

Abituriyentlar o'z mutaxassisligiga mos bakalavriat ta'lim yo'nalishlari bo'yicha oliy ta'lim muassasalarining 2-bosqichidan o'qishni davom ettirish imkoniyatiga ega.

Suhbat jarayoni va istisnolar

Suhbat natijalariga ko'ra, oliy ta'lim tashkiloti komissiyasi tomonidan qo'yilgan ballarning o'rtacha ko'rsatkichi 67 ball va undan yuqori bo'lsa, abituriyent suhbatdan o'tgan deb hisoblanadi. Shundan so'ng u to'lov-kontrakt asosida bakalavriatning 2-bosqichiga talabalikka tavsiya etiladi.

Shuni alohida ta'kidlash joizki, mazkur qabul tartibi oliy harbiy va oliy harbiylashtirilgan ta'lim muassasalariga, Toshkent davlat yuridik universitetiga, shuningdek, O'zbekistonda faoliyat yuritayotgan xorijiy va nodavlat oliy ta'lim tashkilotlari hamda ularning filiallariga nisbatan tatbiq etilmaydi.