Texnikumlarda dual ta'lim oluvchi o'quvchilarga stipendiya to'lanadi
2026/2027 o'quv yilidan boshlab texnikumlarda dual ta'limda o'qiyotgan o'quvchilarga stipendiya berish tizimi yo'lga qo'yiladi.
O'zbekiston Respublikasi Vazirlar Mahkamasi tomonidan "Texnikumlarda dual ta'lim shaklida tahsil olayotgan o'quvchilarga stipendiya to'lash tartibi to'g'risidagi nizomni tasdiqlash haqida" qaror qabul qilindi. Tasdiqlangan nizomga muvofiq, davlat kasbiy ta'lim tashkilotlarida dual ta'lim shaklida o'qiyotganlarga maxsus platforma orqali stipendiya berish, xarajatlarni moliyalashtirish hamda o'quvchilarni ish beruvchilar tomonidan baholash mezonlari belgilanib berildi. ## Stipendiya miqdorlari va talablari O'zbekiston Respublikasi Prezidentining 2026-yil 16-fevraldagi PF-22-son Farmoniga asosan, dual ta'limda tahsil olayotgan har bir o'quvchiga o'zlashtirish ko'rsatkichidan qat'iy nazar bazaviy hisoblash miqdorining bir baravari miqdorida pul ajratiladi. Shuningdek, fanlarni o'zlashtirish ko'rsatkichi 85 foizdan yuqori bo'lgan yoki kasblar bo'yicha respublika hamda xorijiy tanlovlarda g'oliblikni qo'lga kiritgan o'quvchilarga bazaviy hisoblash miqdorining uch baravari miqdorida stipendiya to'lanishi ko'zda tutilgan. Ushbu tartib 2026/2027 o'quv yilidan boshlab amaliyotga kiritiladi. ## Maxsus platforma va moliyalashtirish masalalari Dual ta'lim oluvchilarga stipendiya to'lash jarayonini boshqarish uchun 2026/2027 o'quv yiliga qadar maxsus platforma ishga tushirilishi rejalashtirilgan. Uni ishlab chiqish Oliy ta'lim, fan va innovatsiyalar vazirligi huzuridagi "Raqamli ta'lim texnologiyalarini rivojlantirish markazi" davlat muassasasi zimmasiga yuklatildi. Platformani yaratish va qo'llab-quvvatlash xarajatlari Agentlikning Kasbiy ta'limni rivojlantirish jamg'armasi mablag'lari hisobidan qoplanadi. Shuningdek, 2026-yil 1-oktabrga qadar mazkur platforma Kambag'allikni qisqartirish va bandlik vazirligining "Yagona milliy mehnat tizimi" idoralararo dasturiy-apparat kompleksi elektron axborot tizimiga hamda "Raqamli hukumat" tizimining integratsiyalashuv platformasiga ulanishi belgilandi. Dual ta'limda o'qiyotgan o'quvchilarga stipendiya berish uchun zarur bo'lgan xarajatlar 2026-yilda Oliy ta'lim, fan va innovatsiyalar vazirligiga ajratilgan byudjet mablag'lari doirasida, 2027-yildan boshlab esa Davlat byudjeti parametrlarida nazarda tutilgan holda amalga oshiriladi.
Manba: UzA
