Andijonda «Jasorat maktabi» tinglovchilari uchun hokim bilan uchrashuv tashkil etildi

Andijon shahridagi harbiy qismda Andijon viloyati hokimi Shuhratbek Abdurahmonov va «Jasorat maktabi» tinglovchilari o'rtasida uchrashuv bo'lib o'tdi. "Hokim va yoshlar uchrashuvi" doirasida tashkil etilgan bu tadbir Yoshlar kuni munosabati bilan o'tkazildi.

Muloqot davomida mamlakatimizda yoshlarning zamonaviy bilim va kasb-hunarlarni egallashi, sifatli ta'lim olishi hamda bo'sh vaqtini mazmunli o'tkazishi uchun yaratilayotgan shart-sharoitlarga alohida e'tibor qaratildi. Yangi O'zbekiston taraqqiyotiga hissa qo'shadigan yuqori salohiyatli kadrlar sifatida voyaga yetishlarida «Jasorat maktabi» loyihasi doirasidagi ishlar muhim ahamiyat kasb etishi ta'kidlandi.

Yoshlar murojaatlari va istiqboldagi rejalar

Loyihasi doirasida harbiy xizmatga kelgan yoshlar o'zlarini qiziqtirgan savollar, tashabbuslar va kelgusidagi rejalari yuzasidan viloyat hokimiga murojaat qilishdi. Tinglovchilar tomonidan bildirilgan muammolar hamda takliflar tinglanib, ularni tez fursatlarda hal etish bo'yicha mas'ullarga aniq vazifalar yuklatildi. Ma'lum muddat talab etiladigan masalalarning ijrosi esa alohida nazoratga olindi.