Buxoro viloyatida maktab direktorlari uchun seminar-trening tashkil etildi
Buxoroda umumta'lim maktablari rahbarlari uchun zamonaviy boshqaruv va KPI tizimiga bag'ishlangan seminar-trening o'tkazildi.
Buxoro viloyati maktabgacha va maktab ta'limi boshqarmasi hamda Osiyo xalqaro universiteti o'rtasidagi hamkorlik doirasida viloyatdagi maktab direktorlari uchun maxsus tadbir tashkil etildi. "Zamonaviy maktab rahbarining integrativ modeli: strategik boshqaruv, nutq va imij salohiyati" deb nomlangan seminar-treningda rahbar kadrlarning salohiyatini oshirish masalalari muhokama qilindi.
Tadbir davomida Osiyo xalqaro universitetining tajribali professor-o'qituvchilari hamda boshqarma mas'ullari ishtirokchilarga amaliy treninglar o'tkazdilar. Unda zamonaviy rahbarlik kompetensiyalari, strategik fikrlash, samarali muloqot hamda rahbar imijini shakllantirish bo'yicha muhim tavsiyalar berildi.
KPI tizimi va ustamalar tartibi tushuntirildi
Seminarda O'zbekiston Respublikasi Prezidentining 2025 yil 19 martdagi farmoni hamda Maktabgacha va maktab ta'limi vazirining tegishli buyrug'i ijrosiga alohida e'tibor qaratildi. Xususan, 2026 yil 1 yanvardan boshlab amaliyotga kiritiladigan KPI tizimi asosida maktab direktorlari va ularning o'rinbosarlariga oylik ustamalar belgilash tartibi batafsil tushuntirildi.
Mutasaddilar faoliyat samaradorligini baholashda shaffoflik, xolislik va natijadorlikni ta'minlash mezonlariga to'xtalib o'tdilar. Shuningdek, rahbar kadrlarning mas'uliyatini yanada oshirish orqali ta'lim sifati va boshqaruv samaradorligini yuksaltirish yo'llari ko'rsatib o'tildi. Yangi joriy etilayotgan KPI tizimi rahbarlar faoliyatini aniq ko'rsatkichlar asosida baholash, boshqaruvda natijaga yo'naltirilgan yondashuvni shakllantirish hamda samarali ishlayotgan xodimlarni moddiy rag'batlantirishda muhim omil bo'lishi ta'kidlandi.
Manba: UzA
