Maktabgacha ta'lim tizimida o'yinga asoslangan model joriy etilishi kutilmoqda

Maktabgacha ta'lim tizimida o'yinga asoslangan ta'lim modelini joriy etish bo'yicha takliflar ilgari surildi. Mazkur yondashuv bolaning yosh xususiyatlari, qiziqishlari hamda tabiiy qobiliyatlarini hisobga olgan holda tarbiya va ta'lim jarayonini yo'lga qo'yishni nazarda tutadi.

Maktabgacha yoshdagi davr bolaning ma'naviy, ijtimoiy va intellektual jihatdan rivojlanishida hal qiluvchi bosqich sanaladi. Shu sababli ta'lim muhitini yangilash, ilg'or xorijiy tajribalarni qo'llash hamda jarayonni zamonaviy talablarga mos ravishda tashkil etish katta ahamiyat kasb etadi.

Yangi tashabbuslar va tayyorlov guruhlari

Taqdimot doirasida bir qator muhim masalalar ham ko'rib chiqildi. Jumladan, bir yillik maktabga tayyorlov guruhlarini majburiy umumiy o'rta ta'limning boshlang'ich bosqichi sifatida tatbiq etish, kadrlar salohiyatini oshirish choralari hamda "Yangi avlod" maktabgacha ta'lim tashkilotlari tarmog'ini shakllantirish masalalari muhokama qilindi.

Davlat rahbari ushbu takliflarni chuqur ishlab chiqib, ularni bosqichma-bosqich hayotga tatbiq etish zarurligini alohida ta'kidladi.