Maktabgacha ta'limda yangi metodika va xalqaro tajriba joriy etilmoqda
Bog'chalar uchun milliy qadriyatlarga mos yangi dastur ishlab chiqilib, tarbiyachilar o'qitilmoqda va markazlar ochildi.
Italiya, Germaniya, Xitoy, Buyuk Britaniya hamda Singapur ilg'or tajribasidan kelib chiqqan holda milliy qadriyatlarimizni o'z ichiga olgan maxsus dastur tayyorlandi. Hozirgi vaqtda 180 ming nafar pedagog va tarbiyachi yangi metodika bo'yicha o'qitish jarayonidan o'tmoqda.
O'yin orqali ta'lim berish tizimi
Mazkur o'yin orqali o'qitishga qaratilgan dastur hozirgi kunda mavjud bog'chalarining 30 foizida amalda qo'llanilmoqda. Joriy yil yakuniga qadar mazkur yondashuv 38 mingdan ziyod bog'chaning barchasida to'liq joriy etilishi rejalashtirilgan.
Xalqaro markazlar faoliyati
Poytaxtimizda YUNESKO homiyligida Italiyaning Rejjio Emiliya markazi hamda Bolalarni erta yoshdan ta'limga jalb qilish mintaqaviy markazi o'z ishini boshladi. Ushbu markazlar xalqaro standartlar hamda ilg'or innovatsion yechimlarni tatbiq etish, shuningdek, o'yin vositasida ta'lim berishga mo'ljallangan amaliy qo'llanmalarni tayyorlashda muhim ahamiyat kasb etadi.
Malaka oshirish va moddiy-texnik baza
Har yili 50 nafardan ilg'or tarbiyachi xorijiy davlatlarda stajirovka o'tashi ko'zda tutilgan. Shuningdek, barcha bog'chalar uchun umumiy hisobda 100 ta videokontent tayyorlanadi. Uch yillik dastur doirasida barcha davlat bog'chalari kompyuter, elektron doska hamda rangli printerlar bilan to'liq jihozlanadi.
Manba: UzA
