Qashqadaryo viloyatida inklyuziv ta'lim va o'quvchilar qamrovi kengaymoqda
Qashqadaryoda inklyuziv ta'lim maktablari soni 167 taga, o'quvchilar soni esa 578 nafarga yetdi.
Mamlakatimizda imkoniyati cheklangan bolalar uchun teng ta'lim sharoitlarini yaratish davlat siyosatining ustuvor yo'nalishlaridan biri hisoblanadi. Qashqadaryo viloyatida ham bu boradagi sa'y-harakatlar natijasida inklyuziv ta'lim muassasalari va qamrov ko'lami ortib bormoqda.
Inklyuziv ta'lim ko'rsatkichlari
Viloyatda bir yil oldin 47 ta maktabda 106 nafar o'quvchi inklyuziv ta'lim bilan qamrab olingan bo'lsa, bugungi kunga kelib bunday maktablar soni 167 taga yetdi. Shuningdek, ulardagi ta'lim oluvchi o'quvchilar soni 578 nafarni tashkil etmoqda.
Jumladan, Nishon tumanidagi 3-sonli umumta'lim maktabida ham inklyuziv sinflar faoliyati yo'lga qo'yilgan bo'lib, imkoniyati cheklangan o'quvchilar uchun maxsus jihozlangan korreksion xona tashkil etilgan. Bu yerda defektolog-o'qituvchi tomonidan bolalar bilan yakka tartibda mashg'ulotlar olib borilishi ularning bilim olishi hamda ijtimoiy muhitga moslashishida muhim ahamiyat kasb etmoqda.
To'garaklar va hamkorlik ishlari
Ta'lim muassasalari va mahalla ijtimoiy xodimlari hamkorligida ehtiyojmand oilalar farzandlarini qo'shimcha to'garaklarga jalb etish bo'yicha ham amaliy ishlar bajarilmoqda. Xususan, 67 nafar o'quvchi matematika, ingliz tili hamda shaxmat-shashka to'garaklariga qamrab olindi. Mutaxassislarning fikricha, bunday tizimli chora-tadbirlar har bir bolaning sifatli ta'lim olishi hamda jamiyat hayotida faol ishtirok etishi uchun qulay sharoitlar yaratmoqda.
Manba: UzA
