Ta'lim muassasalari xodimlari va o'quvchilari har yili psixologik diagnostikadan o'tkaziladi

Qabul qilingan "Uzluksiz ta'lim tizimida psixologik xizmat sohasini ilmiy asosda rivojlantirish chora-tadbirlari to'g'risida"gi prezident qaroriga muvofiq, barcha ta'lim tashkilotlarining o'quvchilari, tarbiyalanuvchilari, talabalari hamda pedagog va tarbiyachilari har bir o'quv yilida kamida bir marotaba maqsadli psixologik diagnostikadan o'tkazilishi belgilandi.

Bosqichma-bosqich joriy etish tartibi

Ushbu tizim ikki bosqichda amaliyotga tatbiq etiladi:

• birinchi bosqichda - 2026/27 o'quv yilidan boshlab maktabgacha va umumiy o'rta ta'lim tashkilotlarida;
• ikkinchi bosqichda - 2027/28 o'quv yilidan boshlab o'rta maxsus, kasbiy va oliy ta'lim tashkilotlarida.

Diagnostika jarayoni va tahlil qilish

Psixologik diagnostika jarayonini tashkil etishda quyidagi tartiblarga amal qilinadi:

• jarayon Psixologiya ilmiy-tadqiqot instituti tomonidan maxsus elektron platformada amalga oshiriladi, shuningdek, shaxsga doir ma'lumotlar hamda diagnostika natijasida aniqlangan ma'lumotlarning sir saqlanishi to'liq ta'minlanadi;
• o'tkazilgan tahlillar natijalari sun'iy intellekt texnologiyalari yordamida ko'rib chiqilib, o'quvchi va pedagoglar "psixologik barqaror", "psixologik qo'llab-quvvatlashga muhtoj" hamda "faol psixologik qo'llab-quvvatlash zarur" deb nomlangan guruhlarga bo'linadi;
• "psixologik qo'llab-quvvatlashga muhtoj" deb topilgan shaxslarga ta'lim muassasasining o'z psixologi, "faol psixologik qo'llab-quvvatlash zarur" toifasiga kiritilganlarga esa tegishli hudud bo'yicha maxsus mentor psixolog biriktiriladi.