Ish va o'qishni birga olib boruvchi xodimlarga qanday kafolatlar beriladi

Qonunchilikka muvofiq, mehnat faoliyatini o'qish bilan birga olib borayotgan xodimlarga zarur sharoitlar yaratib berish talab etiladi. Toshkent davlat yuridik universiteti Yuridik klinikasi xodimi Imomali Tuyev bu boradagi qoidalar haqida ma'lumot berdi.

Kafolatlar kimlarga beriladi

Kafolat va kompensatsiyalar asosiy ish joyidan faqat birinchi marta tegishli darajadagi ta'lim olayotgan shaxslarga taqdim etiladi. Agar xodim shu darajadagi ta'limni oldin olgan bo'lsa-da, lekin ish beruvchi uni ichki hujjatlar, mehnat shartnomasi yoki alohida kelishuv asosida qayta o'qishga yuborgan taqdirda ham ushbu imtiyozlar berilishi mumkin.

Agar xodim ayni paytda ikkita ta'lim muassasasida o'qiyotgan bo'lsa, kafolatlar faqat uning o'zi tanlagan bitta ta'lim tashkiloti uchun amal qiladi. Mehnat kodeksining 383-moddasida ko'rsatilgan o'quv ta'tili xodimning umumiy ish stajiga qo'shib hisoblanadi.

Beriladigan imtiyoz va kompensatsiyalar

Oliy va o'rta maxsus ta'lim muassasalarida kechki yoki sirtqi shaklda o'qiyotgan xodimlarga quyidagi kafolatlar taqdim etiladi:

• Laboratoriya-imtihon sessiyalari, davlat imtihonlari hamda diplom loyihasini himoya qilish davrida o'rtacha ish haqi saqlangan holda qo'shimcha o'quv ta'tillari beriladi.
• Imtihonlar va diplom ishi topshiriladigan davrda qonunchilikda belgilangan tartibda ish haftasini qisqartirish yoki ishdan ozod etish kunlari taqdim etiladi.
• Sirtqi bo'limda o'qiydiganlarga yiliga bir marta laboratoriya-imtihon sessiyasiga borib-kelish, shuningdek davlat attestatsiyasidan o'tish uchun ta'lim muassasasi joylashgan yerga borish va qaytish yo'lkira haqining 50 foizidan kam bo'lmagan miqdori ish beruvchi tomonidan qoplab beriladi.
• Xodimlarning navbatdagi yillik mehnat ta'tillari o'quv ta'tillaridan foydalangan yoki foydalanmaganidan qat'i nazar beriladi. Shuningdek, xodimning xohishiga ko'ra yillik ta'tilni imtihonlar yoki sessiyalar davriga to'g'rilab berish ham mumkin.