Ta'lim muassasalarida pedagog va o'quvchilar psixologik diagnostikadan o'tkaziladi

Qabul qilingan Prezident qaroriga muvofiq, uzluksiz ta'lim tizimida psixologik xizmat ko'rsatish sohasini rivojlantirish chora-tadbirlari belgilandi. Ushbu hujjatga asosan, mamlakatdagi barcha ta'lim muassasalarining pedagog va tarbiyachilari, shuningdek, o'quvchi, tarbiyalanuvchi va talabalari har o'quv yilida kamida bir marotaba maqsadli psixologik diagnostikadan o'tkazilishi belgilab qo'yildi.

Bosqichma-bosqich joriy etish tartibi

Mazkur tizim amaliyotga ikki bosqichda tatbiq etiladi:

• Birinchi bosqich 2026/2027 o'quv yilidan boshlab maktabgacha hamda umumiy o'rta ta'lim tashkilotlarida boshlanadi.
• Ikkinchi bosqich 2027/2028 o'quv yilidan e'tiboran o'rta maxsus, kasbiy va oliy ta'lim tashkilotlarini qamrab oladi.

Diagnostika jarayoni va tahlil mexanizmlari

Psixologik diagnostika jarayonini tashkil etishda maxsus elektron platformadan foydalaniladi. Bu jarayon Psixologiya ilmiy-tadqiqot instituti tomonidan yuritilib, shaxsga doir hamda diagnostika natijasida aniqlangan ma'lumotlarning sir saqlanishi to'liq ta'minlanadi.

Olingan natijalar sun'iy intellekt texnologiyalari yordamida tahlil qilinadi. Natijalarga ko'ra, pedagog va o'quvchilar "psixologik barqaror", "psixologik qo'llab-quvvatlashga muhtoj" hamda "faol psixologik qo'llab-quvvatlash zarur" deb nomlangan guruhlarga ajratiladi. Bunda "psixologik qo'llab-quvvatlashga muhtoj" qatnashchilarga ta'lim muassasasining o'z psixologi, "faol psixologik qo'llab-quvvatlash zarur" guruhidagilarga esa hududiy mentor psixolog biriktirilishi ko'zda tutilgan.

Xodimlarni rag'batlantirish va ilmiy institut tashkil etish

Kaskadli malaka oshirish kursiga o'qituvchi sifatida jalb qilingan psixologlarga mazkur davr mobaynida asosiy ish joyidagi lavozim maoshiga nisbatan 20 foiz miqdorida ustama to'lanadi. Shuningdek, o'quv yili davomida psixologik barqarorlikni ta'minlashda yuqori ko'rsatkichlarga erishgan 150 nafar mentor psixolog mehnatga haq to'lashning eng kam miqdorining 20 barobari miqdorida bir martalik pul mukofoti bilan rag'batlantiriladi. Ta'lim muassasalarining psixologik xizmat xodimlari besh yilda kamida bir marotaba o'z malakasini oshirishi shart etib belgilanadi.

Bundan tashqari, Nizomiy Ganjaviy nomidagi O'zbekiston milliy pedagogika universitetining Psixologiya o'quv-ilmiy markazi negizida Psixologiya ilmiy-tadqiqot instituti tashkil etilib, Ta'lim va ilm-fan vazirligi tasarrufiga o'tkaziladi. Yangi institutda 2027-yil 1-yanvardan boshlab Raqamli psixologiya va sun'iy intellekt, Ta'lim psixologiyasi va psixologik xizmat, shuningdek, Psixologik salomatlik va profilaktika laboratoriyalari o'z faoliyatini boshlaydi.