Toshkentda HSK va Xitoyda ta'lim olish imkoniyatlariga bag'ishlangan uchinchi forum o'tkazildi

Ekologiya va iqlim o'zgarishi milliy qo'mitasi huzuridagi Green University'ga qarashli Markaziy Osiyo ekologiya va atrof-muhit tadqiqotlari markazida HSK: Xitoyda ta'lim mavzusidagi uchinchi O'zbekiston forumi bo'lib o'tdi. Mazkur tadbirda ikki mamlakat vakillari, vazirliklar mas'ullari hamda Xitoyning 26 ta yetakchi oliy ta'lim muassasasi delegatsiyasi qatnashdi.

Akademik hamkorlik va grant imkoniyatlari

Tadbir doirasida ishtirokchilarga Xitoy universitetlarining bakalavriat, magistratura hamda doktorantura ta'lim dasturlari tanishtirildi. Shuningdek, talabalar uchun ajratiladigan grant va stipendiya imkoniyatlari, hujjat topshirish tartib-qoidalari haqida batafsil ma'lumotlar berildi. Forum uzoq muddatli institutsional hamkorlikni mustahkamlash, akademik almashinuvni kengaytirish hamda atrof-muhitni muhofaza qilish, iqlim barqarorligi va cho'llanishga qarshi kurashish kabi yo'nalishlarda qo'shma ilmiy tadqiqotlarni rivojlantirishga xizmat qilishi ta'kidlandi.

HSK imtihonining ahamiyati

Anjumanda xitoy tili darajasini aniqlovchi HSK imtihonining o'rni alohida qayd etildi. Ma'lum qilinishicha, Hànyǔ Shuǐpíng Kǎoshì chet elliklarga mo'ljallangan bo'lib, mandarin tilini qanchalik bilishni baholaydi. Bu sertifikat Xitoy oliygohlariga o'qishga kirish, grant va stipendiyalar qo'lga kiritish, shuningdek, ushbu mamlakatda ishlash yoki stajirovka o'tash uchun talab etiladi va til ko'nikmalarini rasman tasdiqlaydi.

Xalqaro o'quv seminari

Forum doirasida Markaziy Osiyoda cho'llanishga qarshi kurash texnologiyalari mavzusida xalqaro o'quv seminari ham tashkil etilishi ko'zda tutilgan. Mazkur seminar Xitoy fanlar akademiyasining Shinjon ekologiya va geografiya instituti, shuningdek, Shimoli-g'arbiy ekologiya, atrof-muhit va resurslar instituti hamkorligida 24-mayga qadar davom etadi. U mintaqaviy ekologik barqarorlikni ta'minlash va yashil iqtisodiyot tamoyillarini joriy etishga qaratilgan.