Xorijiy OTMda o'qigan davlat xizmatchilarining staji hisobga olinadi
Davlat xizmatchilarining xorijiy oliy ta'lim muassasalarida o'qigan davri mehnat stajiga qo'shilishi va imtiyozlar berilishi ko'zda tutilmoqda.
Davlat xizmatchilari uchun xorijda o'qish imkoniyatlari kengaymoqda
Senatning Fan, ta'lim va sog'liqni saqlash masalalari qo'mitasining majlisida davlat fuqarolik xizmati sohasini rivojlantirishga qaratilgan qonun loyihasi dastlabki tarzda muhokama qilindi. Unga ko'ra, “Davlat fuqarolik xizmati to'g'risida”gi O'zbekiston Respublikasi qonuniga muhim o'zgartirish va qo'shimchalar kiritish rejalashtirilmoqda.
Ish o'rni va mehnat stajini saqlash kafolatlari
Qonun loyihasida davlat fuqarolik xizmatchisi xorijiy oliy ta'lim muassasalarining magistratura yoki doktorantura dasturlari bo'yicha grant yutib olgan taqdirda, uning o'qish davrida ish o'rni va lavozimi saqlanib qolishi belgilanmoqda. Buning uchun davlat organi rahbarining yozma roziligi talab etiladi. Shuningdek, xorijiy OTMda tahsil olingan davr xodimning umumiy mehnat stajiga qo'shiladi va ko'p yillik xizmati uchun qo'shimcha haq belgilash jarayonida inobatga olinadi.
Majburiy ishlab berish sharti
Ta'lim dasturini muvaffaqiyatli yakunlab qaytgan davlat fuqarolik xizmatchisining zimmasiga tegishli davlat organi tizimida xorijiy oliy ta'lim muassasasida o'qigan davriga teng muddatda ishlab berish majburiyati ham yuklatilishi ko'zda tutilgan.
Manba: UzA
