Kontrakt to'lovini amalga oshirishda ikki va uch tomonlama shartnomani tanlash tartibi
Talabalar contract.edu.uz orqali shartnoma tuzishda ikki yoki uch tomonlama turini qanday tanlashi va to'lov muddatlari haqida ma'lumot.
Oliy ta'lim muassasalariga o'qishga qabul qilingan talabalar hamda abituriyentlar kontrakt to'lovlarini amalga oshirish uchun contract.edu.uz platformasi orqali onlayn ariza topshiradilar. Shartnomani rasmiylashtirish bosqichida "Shartnoma turini tanlash" bandida ikki tomonlama yoki uch tomonlama shartnomalardan birini belgilash talab etiladi.
Ikki tomonlama shartnoma OTM va talabaning o'zi o'rtasida tuziladi. Agar kontrakt yoki super-kontrakt summasi talabaning shaxsiy mablag'lari hisobidan to'lanadigan bo'lsa, ushbu tur tanlanadi. Shuningdek, ota-onalarning ish haqi yoki boshqa shaxsiy jamg'armalari evaziga to'lov qilish rejalashtirilganda hamda bankdan ta'lim krediti olib o'qish pulini to'laydigan talabalar ikki tomonlama shartnomani tanlashlari lozim.
Uch tomonlama shartnoma esa oliygoh, talaba hamda homiy tashkilot o'rtasida tuziladi. Agar kontrakt yoki super-kontrakt to'lovi talaba yoki uning ota-onasi tomonidan emas, balki biron-bir korxona yoki tashkilot tomonidan homiy sifatida to'lab beriladigan bo'lsa, uch tomonlama shartnoma belgilanadi. Bunday holda hujjatni rasmiylashtirish jarayonida homiy tashkilotning STIR raqamini kiritish talab etiladi.
Talabalarga bir yillik kontrakt summasini to'rt qismga bo'lib to'lash imkoniyati yaratilgan. Amaldagi tartibga ko'ra, birinchi bosqichda 25 foiz miqdoridagi to'lovni 1-oktabrga qadar amalga oshirish shart.
Manba: Kun.uz