O'zbekistonda «Besh million sun'iy intellekt yetakchilari» loyihasi boshlanadi
Hukumat qarori bilan yoshlarni IT sohasiga yo'naltirishga qaratilgan yangi tanlov va rag'batlantirish choralari tasdiqlandi.
2025 yil 31 dekabr kuni Vazirlar Mahkamasining «Yoshlarni AT sohasiga jalb qilish, ularning raqamli bilim va ko'nikmalarini oshirish orqali yuqori daromadli kasblarga yo'naltirish chora-tadbirlari to'g'risida»gi 849-sonli qarori qabul qilindi. Ushbu hujjatga ko'ra, Raqamli texnologiyalar vazirligi, Maktabgacha va maktab ta'limi vazirligi hamda Oliy ta'lim, fan va innovatsiyalar vazirligi «Bir million dasturchi» loyihasining mantiqiy davomi sifatida «Besh million sun'iy intellekt yetakchilari» loyihasini amalga oshirishga kirishadi. Shuningdek, mazkur tashabbus doirasida yil yakuni bo'yicha eng yuqori natijalarga erishgan yoshlar, ularning o'qituvchilari hamda ta'lim tashkilotlarini rag'batlantirish taklipi ma'qullandi.
Milliy tanlov va rag'batlantirish choralari
Qarorga muvofiq, har yili «Besh million sun'iy intellekt yetakchilari» loyihasi doirasida eng yuqori natija ko'rsatgan ishtirokchilarni taqdirlash bo'yicha maxsus milliy tanlov o'tkazib borilishi belgilandi. Tanlov g'oliblariga turli pul mukofotlari va qimmatbaho sovg'alar topshirilishi ko'zda tutilgan. Jumladan:
- 100 nafar o'qituvchi — 1 000 AQSh dollari ekvivalentida pul mukofoti;
- 10 nafar o'qituvchi — xorijiy sayohatga yo'llanma;
- 500 nafar yoshlar — noutbuk;
- 500 nafar yoshlar — qimmatbaho sovg'alar;
- 3 ta oliy ta'lim tashkiloti — pul mukofoti;
- 2 ta umumta'lim maktabi («Prezident sovg'asi») — elektromobil bilan taqdirlanadi.
Manba: Kun.uz
