Testdan ozod qilingan abituriyentlarga ruxsatnoma berilmaydimi
Test sinovidan ozod etilgan abituriyentlar uchun ruxsatnoma rasmiylashtirilmaydi va ular imtihonga bormaydi.
Bilim va malakalarni baholash agentligi ma'lumotiga ko'ra, test sinovidan ozod etilish huquqiga ega bo'lgan abituriyentlar uchun ruxsatnoma shakllantirilmaydi. Mazkur tartib milliy sertifikat asosida yoki qonunchilikda belgilangan boshqa asoslarga ko'ra imtihondan ozod etilganlarning barchasiga bir xil tatbiq qilinadi.
Xususan, ro'yxatdan o'tish jarayonida barcha fanlardan milliy sertifikatga ega ekanligini bildirib, «sertifikatdan foydalanaman» tanlovini belgilagan fuqarolar test sinovidan ozod etilganlar jumlasiga kiradi. Shu sababli ularning shaxsiy kabinetida ruxsatnoma chiqmaydi va belgilangan test manziliga borish talab etilmaydi.
Qabulning ikkinchi bosqichi
Agentlik bergan ma'lumotlarga ko'ra, sinovlar to'liq yakuniga yetgach, mazkur toifadagilar ham oliy ta'lim muassasalariga qabul qilish jarayonining ikkinchi bosqichida qatnashadi. Ushbu bosqich davomida ularga o'n besh kun mobaynida oliy ta'lim muassasasi, bakalavriat ta'lim yo'nalishi, ta'lim shakli va tanlov ustuvorligini mustaqil ravishda tanlash imkoniyati taqdim etiladi.
Manba: Kun.uz
