Toshkent shahridagi Naqsh hunarmandchilik maktabida ilk o'quv yili boshlandi
Toshkentdagi Naqsh maktabida an'anaviy san'at va hunarmandchilik bo'yicha ikki yillik kunduzgi diplom dasturi o'z ishini boshladi.
Toshkent shahridagi "Naqsh" hunarmandchilik maktabida an'anaviy san'at hamda hunarmandchilik yo'nalishida yangi avlod mutaxassislarini tayyorlashga mo'ljallangan ikki yillik kunduzgi diplom dasturining ilk o'quv yiliga start berildi. Mazkur ta'lim tashabbusi O'zbekiston Madaniyat va san'atni rivojlantirish jamg'armasi hamda Qirollik jamg'armasi An'anaviy san'at maktabi hamkorligida hayotga tatbiq etildi. Dasturning asosiy maqsadi yurtimizning boy amaliy-bezak san'ati an'analarini chuqur o'zlashtirgan va ularni zamonaviy yondashuvlar asosida davom ettira oladigan dizayner-hunarmandlarni shakllantirishdan iboratdir.
Ta'lim jarayoni va yo'nalishlar
O'quv jarayonida nazariya va amaliyot uzviy bog'liqlikda olib boriladi. Talabalar geometriya va geometrik naqshlar, islimiy naqsh va kompozitsiya, rang nazariyasi, tabiiy pigmentlar va an'anaviy bo'yoqlar, naturadan rasm chizish, kulolchilik, koshinkorlik, xattotlik, me'morchilik asoslari hamda yog'och o'ymakorligi kabi sohalarda saboq oladilar. Shuningdek, darslarda qadama bezak, an'anaviy panjarasozlik hamda me'moriy bezaklarda ishlatiladigan tabiiy pigmentlar va bog'lovchi moddalarni tayyorlash bo'yicha ko'nikmalar o'rgatiladi. Ta'lim faqatgina alohida texnikalarni o'rganish bilan cheklanib qolmay, g'oyadan tortib tayyor asarni yaratishgacha bo'lgan yaxlit ijodiy jarayon sifatida olib boriladi.
Xalqaro hamkorlik va yakuniy loyihalar
O'quvchilarga Buyuk Britaniya, Eron, Rossiya, Turkiya, Iordaniya va boshqa davlatlardan taklif etilgan xalqaro mutaxassislar, jumladan Qirollik jamg'armasi An'anaviy san'at maktabining taniqli bitiruvchilari dars beradilar. Ikki yillik ta'lim yakunida har bir talaba O'zbekistonning me'moriy merosi asosida o'zining individual ijodiy qarashini namoyon etuvchi mustaqil loyihasini taqdim etishi belgilangan.
Manba: UzA
