Turkiyada ishlaydigan mutaxassislar uchun malaka baholash va sertifikatlash tizimi joriy etiladi
Turkiyada mehnat qilishni rejalashtirayotgan o'zbekistonliklar uchun turk standarti asosida malaka baholash va sertifikatlash jarayonlari boshlanadi.
Migratsiya agentligi Turkiyaning Arya tashkiloti bilan hamkorlik to'g'risida bitim imzoladi. Mazkur kelishuv Turkiyada mehnat qilishni rejalashtirayotgan yurtdoshlar uchun yangi imkoniyatlar yaratishga qaratilgan bo'lib, fuqarolarning kasbiy mahoratini rasman tasdiqlashga xizmat qiladi.
Hududlarda malaka baholash markazlari ish boshlaydi
Qabul qilingan bitimga muvofiq, endilikda Toshkent, Namangan va Sirdaryo viloyatlarida 25 ta kasb bo'yicha mutaxassislar turk standarti asosida malaka baholash jarayonlaridan o'tadi va natijada sertifikatga ega bo'ladi. Bu esa ishga joylashishda talabgorlikni oshirish hamda mehnat migratsiyasi jarayonlarini tartibga solishga xizmat qiladi.
Akkuyu AESda yuqori daromadli ish o'rinlari
Ushbu tashabbus natijasida 2026 yilda 1 500 nafar sertifikatga ega mutaxassis Turkiyaning Mersin viloyatida joylashgan Akkuyu atom elektr stansiyasidagi yuqori daromadli ish o'rinlariga joylashtirilishi rejalashtirilgan. Shuningdek, loyiha nafaqat ishga joylashtirish, balki mutaxassislarning malakasini xalqaro talablar asosida baholash, ularning huquqiy himoyasini ta'minlash hamda mehnat shartlarini shaffoflashtirishga qaratilgan yo'nalishlarni ham qamrab oladi.
Manba: Kun.uz
